O‘zbekiston yovvoyi hayvonlarning ko‘chib yuruvchi turlarini muhofaza qilishda birlashishga chaqiradi
2025-02-11 12:00:00 / Yangiliklar
O‘zbekiston Respublikasining Berlindagi elchixonasida Konvensiya kotibiyati bilan hamkorlikda tashkil etilgan tadbirda 50 dan ortiq oliy darajadagi vakillar ishtirok etdi. Ular orasida Germaniyaning Atrof-muhit, tabiatni muhofaza qilish, yadroviy xavfsizlik va iste'molchilar huquqlarini himoya qilish federal vazirligi shtat kotibi S. Tidou, CMS konvensiyasi ijrochi kotibi E. Frenkel, Tabiat va bioxilma-xillikni muhofaza qilish ittifoqi (NABU) Bosh direktori S. Baumann, Braziliya, Nepal, Venesuela, Laos, Janubiy Koreya va Kolumbiyaning Favqulodda va muxtor elchilari, elchixonalar va xalqaro tashkilotlar vakillari ishtirok etdi.
Tadbirda atrof-muhitni muhofaza qilish bo‘yicha mamlakatimizning milliy va xalqaro miqyosdagi strategiyasi taqdim etildi. Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov CMS konvensiyasiga yangi davlatlar qo‘shilishi muhimligini ta’kidlab, O‘zbekiston raisligi (2024–2026-yillar) davrida tashkilotga a’zo bo‘lishdan manfaatdor davlatlarga zarur yordam ko‘rsatishga tayyorligini bildirdi.
Emi Frankel o‘z navbatida O‘zbekistonning ko‘chib yuruvchi turlarni muhofaza qilish tashabbusini ilgari surishdagi yetakchi rolini qayd etib, Samarqandda bo‘lib o‘tgan Konvensiya ishtirokchilarining 14-konferensiyasida qabul qilingan qarorlarni amalga oshirish bo‘yicha sa’y-harakatlarni birlashtirish muhimligini ta’kidladi. Shuningdek, u ishtirokchi mamlakatlarga ekologik tashabbuslarni samarali amalga oshirishga yordam beradigan strategik hujjatlarga to‘xtaldi.
Ishtirokchilarni O‘zbekistonda bo‘lib o‘tadigan quyidagi xalqaro tadbirlarga taklif etish uchrashuvning muhim qismi bo‘ldi:
• Birinchi Samarqand iqlim forumi (2025-yil 4–5-aprel);
• “Eco Expo Central Asia” ekologik texnologiyalar xalqaro ko‘rgazmasi (2025-yil 3–5-iyun);
• CITES Konvensiyasi ishtirokchilari konferensiyasining 20-yig'ilishi (2025-yil 24-noyabr – 5-dekabr).
O‘zbekiston global ekologik kun tartibiga sodiqligini yana bir bor tasdiqlab, xalqaro hamjamiyatni tabiatni muhofaza qilish va yovvoyi hayvonlar ko‘chib yuruvchi turlarining barqaror kelajagini ta’minlash bo‘yicha birgalikda chora ko‘rishga chaqiradi.