Bu haqda “Oʻzbekiston–2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi toʻgʻrisida Oʻzbekiston Respublikasi Prezidenti Farmoni loyihasida qayd etilgan.

Dastur joriy etilishi tufayli quyidagi natijalarga erishiladi: 

 — jamoatchilik fikri asosida barcha sogʻliqni saqlash va taʼlim muassasalarida qoʻl yuvish joylari zarur sanitariya-gigiyena vositalari bilan taʼminlanadi;

— sanitariya-gigiyena xonalarining texnik holati yaxshilanadi;

— sanitariya-gigiyena xonalari yangi qurilayotgan muassasalarda  binoning ichki qismida joylashtiriladi;

— barcha turdagi jamoat sanitariya-gigiyena xonalari, shu jumladan, umumiy ovqatlanish tashkilotlarini sanitariya-gigiyena vositalari bilan taʼminlash bilan bogʻliq dastur qabul qilinadi;

— 2025-yil 1-avgustga qadar Jahon sogʻliqni saqlash tashkiloti va BMTning xalqaro ekspertlari jalb etilgan holda respublikaning barcha ijtimoiy soha muassasalarida “2025–2028-yillarda Oʻzbekistonda sanitariya-gigiyena tizimini yaxshilash” dasturi loyihasi ishlab chiqilib, Vazirlar Mahkamasiga kiritiladi;

— asosiysi, mamlakatning sanitariya-epidemiologiya holati va aholi salomatligi yaxshilanadi.

"Toza qo‘llar" dasturi sogʻliqni saqlash va taʼlim muassasalarida sanitariya-gigiyena xonalarining texnik holatini yaxshilashga xizmat qiladi.

Maʼlumot uchun, Prezident Farmoni loyihasi “Oʻzbekiston-2030” xalq strategiyasi onlayn portalida keng jamoatchilik muhokamasiga qoʻyilgan. Loyiha 2025-yil 22-yanvarga qadar keng jamoatchilik va ekspertlik muhokamalaridan oʻtkaziladi. Unda siz ham faol ishtirok etib, oʻz taklif va mulohazalaringizni uzbekistan2030.uz onlayn portali hamda @Ekologiya_yili_bot telegram boti orqali yuborishingiz mumkin!