Tadbirda 200 nafardan ortiq ekspertlar, xususan, Oliy Majlis Senati a’zolari, Oliy Majlis Qonunchilik palatasi deputatlari, O‘zbekistondagi xorijiy diplomatik korpus hamda xalqaro tashkilotlar, vazirlik, idora va tashkilotlar vakillari, BMT “oilasi”ga kiruvchi barcha agentliklarning O‘zbekistondagi vakolatxonalari rahbarlari va ekspertlari (UNICEF, UNESCO, UNDP, FAO, UNFPA, UNAIDS, UNODC, ILO, WHO, UNHCR, UNECE), Jahon banki, Islom taraqqiyot banki, Yevropa tiklanish va taraqqiyot banki, Yevropada Xavfsizlik va Hamkorlik Tashkiloti vakillari hamda dunyoning turli chekkalaridan 30 dan ortiq xorijiy ekspertlar, “Taraqqiyot strategiyasi” markazi ekspertlari, fuqarolik jamiyati institutlari hamda OAV vakillari ishtirok etdi. 

Tadbirda nutq so‘zlagan Ekologiya, atrof-muhitni muhofaza qilish va iqlim o‘zgarishi vaziri o‘rinbosari Iskandar Qutbiddinov Prezident Farmoni loyihasida taklif qilingan atrof-muhitni asrash, xususan, atmosferani muhofaza qilish, ekologik sug‘urta, plastik chiqindilarni kamaytirish, "Yashil tadbirkor" maqomini joriy qilish va boshqa loyihalar haqida to‘xtaldi.

"Mazkur Farmon loyihasidan maqsad “O‘zbekiston–2030” strategiyasida belgilangan vazifalarni bajarish, dolzarb masalaga aylangan ekologik muammolarni hal etish, atrof-muhitni ifloslantirmaslik, tabiiy resurslardan tejamkorlik bilan foydalanish, iqlim o‘zgarishiga moslashish va uning oqibatlarini yumshatish, aholi yashashi uchun qulay tabiiy muhit yaratishdir", — dedi I.Qutbiddinov. 

Ta'kidlash joizki, so‘nggi yillarda O‘zbekistonda qabul qilinayotgan muhim hujjatlar, ayniqsa mamlakatimizning taraqqiyotiga bevosita daxldor hisoblangan strategik hujjatlar loyihalarini tayyorlashda keng jamoatchilik, shuningdek, xorijiy ekspertlar va xalqaro jamoatchilikning fikr-mulohazalarini o‘rganishga muhim ahamiyat qaratilmoqda. 

Tadbir davomida Davlat dasturining mazmun-mohiyati va unda belgilanayotgan ustuvor chora-tadbirlar hamda vazifalar haqida ma’lumot berildi. Shuningdek, bu borada xorijiy ekspertlarning fikr-mulohazalari, tavsiyalari tinglandi. Qolaversa, muhokamalar jarayonida Davlat dasturi loyihasida belgilanayotgan chora-tadbirlar va vazifalar bugungi globallashuv jarayonida yangi O‘zbekistonning xalq farovonligi, tinchligi, demokratiya va inson huquqlari kafolatini ta’minlaydigan erkin jamiyat va adolatli davlat qurishga qaratilgan konseptual hujjat ekanligi ta'kidlandi. Shu bilan birga, jamoatchilik, shu jumladan, xalqaro hamjamiyat vakillari bilan muhokama qilish orqali Dasturni takomillashtirish, xalqchilligini va xalqaro standartlarga to‘liq mos kelishini ta’minlash muhim ekanligi alohida qayd etildi.

Ma'lumot uchun, 2025-yil Davlat dasturi loyihasida 295 ta amaliy chora-tadbirlar, 87 ta normativ-huquqiy hujjatlar, 269 ta maqsadli ko‘rsatkichlar belgilanishi nazarda tutilmoqda. 

“O‘zbekiston–2030” strategiyasini “Аtrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida O‘zbekiston Respublikasi Prezidenti Farmoni loyihasi “O‘zbekiston-2030” xalq strategiyasi onlayn portalida keng jamoatchilik muhokamasiga qo‘yilgan.  Shuningdek, o‘z taklif va mulohazalaringizni @Ekologiya_yili_bot telegram boti orqali ham yuborishingiz mumkin!