O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi

Samarqandda o‘tkazilgan ikkita reyd davomida ham tabiatga katta miqdorda zarar yetkazilgan qonunbuzarlik holatlari aniqlandi. Xususan,  Qoradaryo daryosining Samarqand viloyatidan oqib o‘tuvchi, Oqdaryo tumaniga tutash qismida bir guruh fuqarolar tomonidan tungi  soat 02:00 da noqonuniy ravishda qum-shag‘al qazib olinayotganligi va holat joyiga yaqin tosh maydalash sexiga olib borilayotganligi ma’lum bo’ldi. Natijada tabiatga 118 milliard so‘m zarar yetkazilgan.

Holat yuzasidan barcha hujjatlar rasmiylashtirilib, 1 dona ekskavator va 2 ta yuk tashuvchi transport vositalari jarima maydoniga joylashtirildi.

Bundan tashqari, Zarafshon daryosining Samarqand viloyatidan oqib o’tuvchi, Toyloq tumaniga tutash qismida ham bir guruh fuqarolar tomonidan tungi  soat 04:30 da Zarafshon daryosidan noqonuniy ravishda Zarafshon milliy tabiat bog’i hududidan 7 ta ekskavator va 25-30 ta yuk tashuvchi transport vositalaridan foydalangan holda qum-shag’al qazib olinayotganligi hamda tosh maydalash sexlariga olib borilayotganligi aniqlandi. Bu qonunbuzarlik natijasida tabiatga yetkazilgan zarar 708 mlrd so’mni tashkil etgan.

Holat bo’yicha barcha hujjatlar rasmiylashtirilib, 1 dona ekskavator va 3 dona yuk tashuvchi transport vositalari tegishli tartibda jarima maydoniga joylashtirildi.

Dastlabki o’rganishlar davomida aniqlanishicha, Zarafshon milliy tabiat bog’i hududida noqonuniy qazish ishlari doimiy ravishda olib borilganligi sababli bog’ hududida 7 gektar yashil maydon yo’q bo’lib ketgan.

Yuqoridagi holatlar yuzasidan to‘plangan hujjatlar tegishli chora ko‘rish uchun huquqni muhofaza qilish organlariga yuborildi.

Ma'lumot uchun, O‘zbekiston Respublikasi Prezidentining 2024-yilning 17-yanvardagi “Suv havzalarida noruda materiallarni qazib olishni tartibga solish chora-tadbirlari to‘g‘risida”gi 14-sonli Farmoniga ko‘ra, 2024-yil 1-maydan boshlab Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga muddatsiz moratoriy joriy qilingan. Moratoriy davrida qum-shag‘al materiallarini noqonuniy qazib olish natijasida tabiatga yetkazilgan zarar uchun undirish summalari 10 baravarga oshirilgan holda qo‘llaniladi. 

Unutmang! Ekologiya vazirligi va vazirlikning hududiy boshqarmalari tomonidan noqonuniy qum-shag’al materiallarini qazib olishga qarshi doimiy reyd tadbirlari olib borilmoqda. Bu boradagi har qanday huquqbuzarlik qat’iy jazolanadi!