O‘zbekiston Respublikasi Ekologiya va iqlim o‘zgarishi milliy qo‘mitasi

Tanlov Ekologiya, atrof-muhitni muhofaza qilish va iqlim o‘zgarishi vazirligi, Bosh prokuratura, Oliy ta'lim, fan va innovatsiyalar vazirligi hamda Maktabgacha va maktab ta'limi vazirligi tomonidan har yili yanvar-mart oylarida o‘tkaziladi.

Tanlovda O‘zbekiston Respublikasida istiqomat qilayotgan 14 yoshga to‘lgan va 17 yoshdan oshmagan barcha yoshlar ishtirok etishlari mumkin. Buning uchun o‘quvchilar o‘z ta'lim muassasalaridan 8 kishilik jamoa shakllantirishlari va o‘z hududlaridagi Ekologiya boshqarmalariga onlayn ariza topshirishlari lozim. 

Tanlov 5 bosqichda o‘tkaziladi: 

— saralash (ta'lim muassasasi), 13–17-yanvar; 
— sektor, 20–31-yanvar;
— tuman (shahar), 3–14-fevral;
— hududiy (Qoraqalpog‘iston Respublikasi, viloyatlar va Toshkent shahri), 17–28-fevral;
— respublika, 10–19-mart.

Tanlov shartlari quyidagilar:

1-shart — "Bu bizning hudud". Ishtirokchi jamoalar o‘z hududlarining ekologik holati, ekomadaniyati, piknik madaniyatlari, hudud ekologiyasini yaxshilash uchun qilinayotgan ishlar, yoshlarning ekologiyaga bo‘lgan munosabati ochib berilishi lozim.

2-shart — "Intellektual ring". Jamoalar 3 daqiqa ichida ekologik, ijtimoiy, siyosiy-huquqiy yo‘nalishlardagi 10 ta savolga javob berishlari lozim. Har bir savol uchun 1 ball, to‘liq bo‘lmagan javob uchun 0,5 ball qo‘yiladi. Savollarga tayyorgarlik ko‘rish uchun 2 daqiqa, javob berish uchun 1 daqiqa ajratiladi (10 ballik tizimda baholanadi).

3-shart — "Ekologiya uchun barchamiz mas'ulmiz". Ushbu shartda jamoalar respublikamiz ekologiyasini asrab-avaylashga, yoshlar orasida ekomadaniyatni targ‘ib qilishga qaratilgan, plogging, iqlim o‘zgarishlari, daraxt ekish va kesish hamda suv muammolari bo‘yicha loyihasining mazmun-mohiyatini ochib beradigan ibratli sahna ko‘rinishlari tayyorlashlari lozim.

4-shart — "Eng yaxshi ekologik loyiha". Jamoalar ekologiya sohasini rivojlantirish, yosh ekologlar sonini ko‘paytirish, sohaga investitsiyalarni jalb qilish bo‘yicha o‘z taklif va loyihalarini taqdim etadi. Har bir jamoaga taqdimot uchun 10 daqiqa vaqt beriladi (o‘zbek, rus va ingliz tillarida bo‘lishi mumkin). Loyihalar dolzarb mavzuga qaratilishi, xalqaro tajriba mavjud bo‘lishi, muhim takliflar bildirilishi, takomillashtirilgan, ekologiya sohasida yangi xizmatlar joriy etishga mo‘ljallanishi talab qilinadi.

Agar guruhlar o‘rtasida umumiy ballar teng kelib qolsa, I, II va III o'rinlar sardorlar bellashuvi orqali hal etiladi. Sardorlarga 10 ta blits savollari beriladi. G‘olib va ishtirokchilar diplomlar va qimmatbaho sovg‘alar bilan taqdirlanadi.

Bu kabi tanlovlar yoshlarning ekologik huquqiy ongi va madaniyatini yuksaltirish, qonun ustuvorligini ta'minlash va qonuniylikni mustahkamlash, shuningdek, yoshlarni O‘zbekiston Respublikasi Konstitutsiya va boshqa qonun hujjatlariga hurmat ruhida tarbiyalash, huquqiy immunitetni shakllantirishga xizmat qiladi.