O‘zbekiston Respublikasi Ekologiya va iqlim o‘zgarishi milliy qo‘mitasi

Ta'kidlash joizki, 2025-yilning mamlakatimizda "Atrof-muhitni asrash va “yashil” iqtisodiyot yili" deb e’lon qilinishi nafaqat bugungi, balki kelajak avlodlar manfaatlarini ko‘zlab tabiatni muhofaza qilishga qaratilgan muhim tashabbus bo‘ldi. Bu, o‘z navbatida, inson va tabiat o‘rtasidagi muvozanatni saqlash, tabiiy resurslardan oqilona foydalanish va barqaror rivojlanishni ta’minlashda muhim qadamdir. Shu bilan birga, ijod ahlining ijtimoiy-ma’naviy faolligi va mas’uliyatini oshirib, yangi badiiy asarlar yaratishga ruhlantirishi tabiiy.

Tanlovga Yangi O‘zbekistonda tabiiy resurslardan oqilona foydalanish, ularni qayta tiklash va inson faoliyatining tabiatga salbiy ta’sirining oldini olish, sanitariya va ekologik holatni yaxshilashni ta’minlash sohasida amalga oshirilayotgan islohotlar, erkin va farovon yurtda barkamol avlodni tarbiyalash, xalqimizda ona Vatanni, uning ne’matlarini asrab-avaylash tuyg‘usini kuchaytirishga xizmat qiladigan she’rlar, hikoyalar, dramatik asarlar hamda badiiy publitsistik asarlar qabul qilinadi. 

Shuningdek, ijodiy asarlarda ajdodlarimizdan meros havo, yer va yer osti boyliklari, o‘simlik va hayvonot dunyosini asrashdek milliy qadriyatlarimiz, ijtimoiy hayotdagi yutuqlarimizning barchasi ona tabiat bilan chambarchas bog‘liq ekanligini yosh avlod qalbiga

va ongiga singdirish kabi ezgu g‘oyalar hayotiy misollar, teran fikr-mulohazalar bilan tarannum etilgan bo‘lishi, shu bilan birga, ijod namunalari soha fidoyilarining hayoti va yutuqlari, obodlik, farovonlik yo‘lidagi intilishlarini yoritib berishi lozim.

Tanlovga taqdim etiladigan asarlarning asl yoki elektron nusxasi muallifning telefon raqami va pasport nusxasi bilan birga 2025-yil 20-mayga qadar quyidagi manzilga yuborilishi lozim:

Toshkent shahri, Bunyodkor ko‘chasi, Adiblar xiyoboni (Yozuvchilar uyushmasi).

Ijodiy ishlar, shuningdek, badiiy_adabiyot@mail.ru elektron pochtasi orqali ham qabul qilinadi.

G‘oliblar “Eng yaxshi she’riy asar”, “Eng yaxshi hikoya”, “Eng yaxshi dramatik asar” va “Eng yaxshi badiiy publitsistik asar” nominatsiyalari bo‘yicha aniqlanadi va 5-iyun – Butunjahon atrof-muhit kuni arafasida pul mukofotlari, diplom va qimmatbaho sovg‘alar bilan taqdirlanadi:

Bitta birinchi o‘rin — bazaviy hisoblash miqdorining 25 baravari miqdorida;

bitta ikkinchi o‘rin — bazaviy hisoblash miqdorining 15 baravari miqdorida;

bitta uchinchi o‘rin — bazaviy hisoblash miqdorining 5 baravari miqdorida.

Tanlovga taqdim etilgan asarlar saralanib, kitob holida chop etiladi.

Qo‘shimcha ma'lumot uchun tel.: (71) 231-83-69.