“Avtomobilsiz kun”da respublikamizdagi davlat va nodavlat tashkilotlar rahbarlari va xodimlarini, barcha yurtdoshlarimizni shaxsiy transport vositalaridan voz kechib, jamoat transporti va velosiped kabi atrof-muhitga zarar yetkazmaydigan transport turlaridan foydalanishga, shuningdek, salomatligingiz uchun ko‘proq piyoda harakatlanishga chaqiramiz! 

Jamoat transportidan foydalanish quyidagi afzalliklarga ega:

1. Atmosfera havosining ifloslanish darajasi kamayadi. Avtomobillar shaharlarni ifloslantiruvchi asosiy manbalardan biridir. Jamoat transportidan foydalanish orqali biz karbonat angidrid gazi va boshqa zararli moddalar tashlamalarini kamaytiramiz.

2. Pul tejaladi. Jamoat transporti ko'pincha shaxsiy avtomobillardan ancha tejamkor variant hisoblanadi (yoqilg’i sarflamaysiz va hokazo)

3. Salomatlik uchun foydali. Jamoat transportidan foydalanish yoki velosipedda yurish jismoniy faollikni rag'batlantiradi, bu esa sog'likka ijobiy ta'sir ko’rsatadi.

4. Tirbandlik kamayadi: jamoat transportidan qanchalik ko'p foydalansangiz, yo’llarda tirbandlik shunchalik kam bo'ladi. Ma’lumotlarga ko’ra, aynan tirbandlik natijasida avtomobillarning bir joyda ishlagan holda to’xtab turishi natijasida atmosferaga ko’proq zararli tashlamalar chiqariladi.

“Avtomobilsiz kun”da ishtirok etish uchun quyidagi tavsiyalarga amal qiling:

— Qiyinchiliklarga duch kelmaslik uchun jamoat transporti jadvali va yo’nalishlarini oldindan aniqlab oling.

— Do'stlaringiz va oilangizni ham jalb qiling. Jamoat transportidan ko’pchilik bo’lib foydalanish vaqtingizni yanada qiziqarli o’tkazishga xizmat qiladi. 

Eng muhimi, jamoat transporidan faqat “Avtomobilsiz kun”da emas, balki, muntazam foydalanishni odatga aylantiring. 

“Avtomobilsiz kun” bizga nafaqat atmosfera havosi, balki umuman atrof-muhitni asrash uchun o’z hissamizni qo’shish imkonini beradi.   Shunday ekan, keling, birgalikda bu imkoniyatdan unumli foydalangan holda o’zimiz nafas olayotgan havo musaffoligini ekologiya tozaligini ta’minlaylik!