O‘zbekiston Respublikasi Ekologiya va iqlim o‘zgarishi milliy qo‘mitasi

Ekologiya, atrof-muhitni muhofaza qilish va iqlim o‘zgarishi vazirligi, Turizm qo‘mitasi va Yosh turizm elchilari kengashi tomonidan tashkil etilgan tadbirda 250 nafarga yaqin talaba yoshlar, jumladan, mamlakatimizning turli oliy o‘quv yurtlari talabalari, yosh tadbirkorlar va xalqaro mehmonlar ishtirok etmoqda.

Tadbirning ochilish marosimida nutq so‘zlagan Ekologiya vaziri Aziz Abduhakimov yurtimizda so‘nggi yillarda hukumat tomonidan turizm sohasi rivoji uchun ko‘plab imkoniyatlar yaratib berilganini ta’kidladi. 

“Prezidentning qaror va farmonlari bilan turizm sohasi rivojlanishi uchun ko’plab imkoniyatlar yaratib berildi. Viza rejimi yengillashtirildi. Natijada 2016-yilda O‘zbekistonga bor-yo‘g‘I 9 ta davlatdan vizasiz kirish mumkin edi. Bugungi kunga kelib esa bunday davlatlar soni 94 taga yetdi, O‘zbekiston xorijlik sayyohlar uchun sevimli maskanlardan biriga aylandi, — dedi vazir. — Qolaversa, «Radisson», «Hilton», «Accor», «Marriott», «Wyndham» va boshqa shu kabi turli mashhur xalqaro brendlar kirib keldi. Turistlar uchun xizmat ko‘rsatish sifati oshirildi. O‘z navbatida rivojlanish bilan bir qatorda milliy urf-odatlar, an’analari ham saqlab qolindiTurli hududlarda faoliyat ko‘rsatayotgan “ethnovillage”, ya’ni etnoqishloqlar sayyohlarga xalqimizning milliy qadriyatlarini tanitib kelmoqda”.

A.Abduhakimov, shuningdek, yoshlar xorijiy tillar, xususan, ingliz va xitoy tillarini mukammal o‘rganishlari lozimligini, turizm sohasi kelajagini iqtidorli, sohani yaxshi tushunadigan yosh kadrlarsiz tasavvur qilib bo‘lmasligini aytib o‘tdi. 

Shuningdek, Toshkent davlat sharqshunoslik universiteti rektori Gulchehra Rixsiyeva ekologiya va turizm sohalarida iqtidorli eko-faol yoshlar soni ortib borayotganini alohida qayd etdi. Respublika yosh turizm elchilari kengashi raisi Komiljon Suyarov esa sohaga oid muammolarga samarali yechim topishda yoshlarning o‘rni mustahkamlanib, fikr-mulohazalariga katta e'tibor qaratilayotganini ta'kidladi.   

Tadbir davomida yosh ishtirokchilar “Yangi O‘zbekiston: barqaror turizm rivojlanishi uchun global hamkorlik” mavzusiga doir turli masalalarni muhokama qilmoqdalar. Har bir delegat o‘z davlatining vakili sifatida ishtirok etib, o‘z pozitsiyasini himoya qilish, yechim taklif qilish va ovoz berishda qatnashadi. Ikki kun davomida yosh delegatlar turli muhim masalalar, muammolar orqali xalqaro tashkilotlarning ishlash mexanizmlarini tushunadilar, dolzarb muammolar borasida muhim qarorlar qabul qilishni o‘rganadilar, diplomatik mahorat va notiqlik san’atini o‘zlashtiradilar hamda muloqot qilish ko‘nikmalarini rivojlantirish va tarmoq yaratish (networking) kabi mavzulardagi bilimlarini mustahkamlaydilar. 

BMT modeli loyihasida o‘zbek, rus va ingliz tillarida yoshlar ekologiya hamda turizm mavzularini keng doirada muhokama qilish imkoniyatiga ega bo‘lishadi. “Munozara” loyihasi yoshlarga mavzularni chuqurroq o‘rganib, o‘zaro fikr almashish uchun xizmat qiladi. Tadbir nafaqat turizm va ekologiya sohasidagi yangi g‘oyalarni o‘rganish, balki yoshlar orasida muloqotni mustahkamlash va xalqaro hamkorlikni kuchaytirishga qaratilgan muhim platforma hisoblanadi.