Termiz shahri atmosfera havosi sifatini yaxshilash bo‘yicha tavsiyalar ishlab chiqiladi
2024-12-05 09:30:00 / Yangiliklar
Loyiha Termiz shahridagi atmosfera havosi holatini batafsil o‘rganish, ifloslantiruvchi manbalarni aniqlash va ekologik vaziyatni yaxshilash bo‘yicha tavsiyalar ishlab chiqishga qaratilgan. Olingan ma'lumotlar bizga havo sifatini monitoring qilish, aholi salomatligini muhofaza qilish va shaharning barqaror rivojlanishi uchun samarali vositalarni yaratishga imkon beradi.
Tadqiqotda mintaqadagi havo sifatiga sezilarli ta'sir ko'rsatadigan "afg'on shamoli", qum va chang bo'ronlarining ta'siriga alohida e'tibor qaratiladi. Atmosfera sifatini monitoring qilish va modellashtirish bo‘yicha jahon tajribasiga ega Finlyandiya meteorologiya instituti texnik va ilmiy yordam ko‘rsatadi. UNEP loyihani muvofiqlashtirish va natijalarni atrof-muhit holatini yaxshilash bo'yicha mintaqaviy va global tashabbuslarga integratsiyalashuvini ta'minlaydi.
"2025-yil mamlakatimizda “Atrof-muhitni asrash va “yashil” iqtisodiyot yili” deb e’lon qilinganini alohida ta’kidlash lozim. Ushbu loyiha hukumatning ekologik barqarorlikni ta’minlash va fuqarolar salomatligini muhofaza qilishga bo‘lgan intilishini o‘zida aks ettiradi. Ishonchimiz komilki, o‘rganish natijalari samarali qarorlar qabul qilish uchun asos bo‘ladi”, — dedi Ekologiya vazirligi Ekologiya siyosati departamenti boshqarmasi boshlig‘i F.Sattorov.
Tadqiqot natijalari 2025-yilda jamoatchilikka taqdim etiladi. Natijalar asosida mahalliy davlat hokimiyati organlari, sanoat korxonalari va boshqa manfaatdor shaxslar uchun tavsiyalar ishlab chiqiladi.