“Aral wetlands” loyihasi xalqaro universitet bilan hamkorlikni yo‘lga qo‘ydi
2024-11-28 13:00:00 / Yangiliklar
Loyihadan asosiy maqsad qoʻriqlanadigan tabiiy hududlar, asosiy biologik xilma-xillik hududlari va ornitologik hududlar atrofidagi samarali landshaftlarning yer va suv resurslarini kompleks boshqarish bilan birgalikda tuproq degradatsiyasining oldini olish orqali Quyi Amudaryo va Orol dengizi havzalarida ekotizim va hayot uchun vositalarning barqarorligini yaxshilashdir.
Uchrashuvda loyiha davomida erishilgan natijalar, tabiiy resurslarga ehtiyotkor munosabatda boʻlish va AKTdan samarali foydalanish muhofaza etiladigan hududlarni boshqarish uchun muhim ekanligi taʼkidlandi. Shuningdek, jamoatchilik xabardorligini oshirish va loyiha hududlarida faoliyat yuritayotgan ilmiy hamjamiyat bilan samarali hamkorlikni shakllantirish masalalari muhokama qilindi.
Yakunda “Uzbekistan Acharya University” va “Aral Wetlands” loyihasi oʻrtasida Hamkorlik memorandumi imzolandi.
Maʼlumot uchun, Acharya ("Acharya Group of Institutions") instituti tarmogʻi 1990-yilda Bangalorda (Hindiston) tashkil etilgan bo‘lib, 100dan ortiq kurslar boʻyicha taʼlim beradigan 10 ta oliy oʻquv yurtlari, shuningdek, 15 ta tadqiqot markazlari, texnologik, arxitektura, farmatsevtika, tibbiyot, politexnika va boshqa institutlarni qamrab oladi. Yiliga 70 dan ortiq davlatdan jami 15 ming nafargacha talaba tahsil oladi. Institutining Oʻzbekistondagi filiali 2023-yilda ochilgan va asosiy eʼtibor axborot texnologiyalari sohasiga qaratilgan.