Tashlamalarning avtomatik monitoring stansiyalarini o‘rnatish tartibi tasdiqlandi
2024-11-28 12:30:00 / Yangiliklar
O‘zbekiston Respublikasi Prezidenti Farmoniga muvofiq atmosfera havosi ifloslanishi fon monitoringini amalga oshirish uchun avtomatlashgan 347 ta kichik stansiyalar o‘rnatiladi. Yangi qarorda ushbu stansiyalarning manzilli ro‘yxati tasdiqlandi.
Atrof tabiiy muhitni ifloslantiruvchi manbalarning monitoringini sifatli yuritish uchun atrof-muhitga ta’siri bo‘yicha I va II toifalarga mansub xo‘jalik yurituvchi subyektlarga atmosferaga ustuvor turg‘un ifloslantiruvchi manbalardan chiqadigan tashlamalarni tahlil qiluvchi avtomatik monitoring stansiyalari o‘rnatiladi. Yuqori samaradorlikka ega chang-gaz tozalash uskunalari va lokal suv tozalash inshootlari o‘rnatiladi va mavjudlari modernizatsiya qilinadi. Sanitar himoya zonalari avtomatik statsionar kuzatuv postlari bilan jihozlanadi.
Atrof-muhitga taʼsiri boʻyicha I va II toifalarga mansub xoʻjalik yurituvchi subyektlarda tashlamalarning avtomatik monitoring stansiyalari, chang-gaz tozalash uskunalari va lokal suv tozalash inshootlari oʻrnatilgani, shuningdek, sanitar himoya zonalari avtomatik kuzatuv postlari bilan jihozlanganini tekshirish tadbirlari Ekologiya vazirligi tomonidan nazorat organlari faoliyatini muvofiqlashtiruvchi vakolatli organ bilan oldindan kelishmasdan oʻtkaziladi. Bunda vakolatli organ Tekshiruvlarni elektron roʻyxatga olish yagona tizimida roʻyxatdan oʻtkazish orqali tekshiruv boshlangan paytdan boshlab yigirma toʻrt soat ichida majburiy ravishda xabardor qilinadi.
Qarorga ko‘ra, tashlamalarning avtomatik monitoring stansiyalari O‘zbekiston Respublikasining O‘zMSt 194:2024 “Atmosfera havosi sifatini avtomatik monitoring stansiyalari. Umumiy texnik shartlar” hamda O‘zMSt 195:2024 “Tashlamalarning avtomatik monitoring stansiyalari. Umumiy texnik shartlar” milliy standartlariga muvofiq bo‘lishi lozim.
Tashlamalarning avtomatik monitoring stansiyalari, avtomatik kuzatish postlari, chang-gaz tozalash uskunalari hamda lokal suv tozalash inshootlari Ekologiya vazirligi huzuridagi Davlat ekologik sertifikatlashtirish va standartlashtirish markazi tomonidan ishlab chiqilgan texnik topshiriq shartlari asosida xarid qilinadi va davlat ishtirokidagi korxonalarga xarid qilinadigan uskunalar va xizmatlar bo‘yicha yetkazib beruvchilarga respublika hududida texnik servis xizmatini tashkil etish talabi qo‘yiladi.
O‘rnatiladigan yangi chang-gaz tozalash uskunalarining samaradorligi 99,5 foizdan, modernizatsiya qilinadigan mavjud uskunalarning samaradorligi esa 95 foizdan kam bo‘lmasligi, shuningdek, o‘rnatiladigan yangi hamda modernizatsiya qilinadigan mavjud lokal suv tozalash inshootlarining samaradorligi 80 foizdan kam bo‘lmasligi kerak.
Bundan tashqari, Qarorga ko‘ra, 2025-yil 1-martga qadar avtomatlashgan kichik stansiyalar xarid qilinishi va manzilli ro‘yxat asosida o‘rnatilishi belgilangan. 1 martdan boshlab esa avtomatlashgan kichik stansiyalar ma’lumotlari atrof tabiiy muhit davlat monitoringi tizimining yagona geoaxborot ma’lumotlar bazasiga integratsiya qilinadi va uzluksiz faoliyat yuritishi rejalashtirilgan.