Tadbir davomida germaniyalik mutaxassis Detlef Haynrixs tomonidan suvsizlikka chidamli daraxtlarni ekish bo’yicha maxsus tajriba amaliyoti o’tkazildi. Mutaxassis Dalvarzin hududi iqlimiga mos daraxtlar yetishtirish borasida tajribalar olib borayotganini ta’kidladi. 

“3 yil davomida tuproq qatlami va iqlimga mos  o’simlik turlari haqida tadqiqotlar olib bordim. Bu yerdagi o’simlik dunyosini o’rgandim. Hozirda esa tajribalarimga tayanib bu hudud iqlimiga, ya’ni suvsizlikka chidamli daraxtlar ko’chat va urug’larini ekishni boshladim. Shuningdek, jiyda, na’matak kabi o’simliklarni ham ekib ko’rmoqchiman. Yakuniy natijalarga ko’ra qanday daraxtlar ekish borasida bir qarorga kelamiz va hududni ko’kalamzorlashtiramiz”, - dedi germaniyalik olim.

U Dalvarzin hududida avval ekilgan, ammo keyin yo’qolib ketgan turang’il daraxtini ekib ko’paytirish  rejalashtirilayotganini qayd etdi. Chunki bu daraxt hudud iqlimiga chidamli, tuprog’iga mos.

Tadbir doirasida o’rmon-ov xo’jaligi hududida 11 turdagi  jami 665 dona daraxt (platanoid chinor, oq chinor yoki nemis chinori, kumush terak, qora terak, Avstriya eman daraxti, Amerika chinori, qizil terak, qarag’ay va boshqa turdagi) ko’chatlari hamda 3 turdagi 6 kg daraxt (qora yong’oq, yong’oq, pechan) urug’lari ekildi. 

Ma’lumot uchun, Dalvarzin o’rmon-ov xo’jaligining umumiy yer maydoni 5 ming 360 gektar bo’lib, maydon o’rmonzorlar va madaniy o’rmonlar, to’qayzorlar, haydaladigan yerlar, bog’zor, tokzor hamda ko’llardan iborat. Xo‘jalikda qamish, shirinmiya va boshqa o‘simlik turlari, shuningdek, to‘ng‘iz, quyon, tulki, chiyabo‘ri, bo‘rsiq, to’qay mushugi, qushlardan qirg‘ovul, yovvoyi kaptar, o‘rdak, qashqaldoq kabilar uchraydi.