Toshkent hayvonot bog‘ining 100 yilligiga bag‘ishlangan “Tarix obyektivda” fotoko‘rgazmasi taqdim etiladi
2024-10-17 15:25:00 / Yangiliklar
Ko‘rgazmada hayvonot bog‘i arxividan olingan, hayratlanarli tarix va hayvonlar xilma-xilligini aks ettiruvchi yuzdan ortiq fotosuratlar taqdim etiladi. Suratlarda hayvonot bog‘idagi hayvonlar va ularga g‘amxo‘rlik qilayotgan xodimlar tasvirlangan.
"Tarix obyektivda" bu shunchaki fotosuratlar ko'rgazmasi emas, balki o'tmishga qiziqarli sayohat bo'lib, hayvonot bog'i yillar davomida qanday o'zgarganini, uning kolleksiyasiga qanday hayvonlar qo'shilganini va xodimlar hayvonot bog'i bugungi holatga kelgunicha qanday yo‘lni bosib o‘tishganini kuzatish imkonini beradi.
Ta’kidlash joizki, Toshkent hayvonot bog‘i bir asr davomida ko‘plab hayvonlar turlarining maskaniga aylangani bilan birga, shahar madaniy-ma’rifiy hayotining muhim qismiga aylangan. Bu nafaqat dam olish va ko‘ngilochar maskan bo‘libgina qolmay, balki noyob turlarni muhofaza qilish, ekologik ta’lim-tarbiya berishda ham muhim o‘rin tutadi.
Ma’lumot uchun, Toshkent hayvonot bog‘ining 100 yilligi 2024-yil 24-oktabrda nishonlanadi. Bugungi kunda uning maydoni 21,5 gektar boʻlib, 336 tur va 8000 dan ortiq hayvonlar yashaydi. Hududda "Qo'lga o'rgatilgan jonivorlar", "Akvarium", "Terrarium", "Maymunxona", "To'tiqushlar", "Qushlar", "Yirtqich hayvonlar", "Suvda suzuvchi qushlar", "Tuyoqlilar", "Mayda sut emizuvchilar" va "Umurtqasizlar" kabi 11 ta ko'rgazmali bo'limlar mavjud. Shuningdek, hayvonlar uchun keng to'siqlar, jumladan, poli issiq katta qishki xonalar mavjud.