Maxsus komissiya atmosfera havosi sifatini muntazam monitoring qilib bormoqda
2026-10-21 14:30:00 / Yangiliklar
21-oktabrga o‘tar kechasi Toshkent shahrida havo sifati noqulay meteorologik sharoitlar ta’sirida qisqa muddatga o‘zgardi. Kechki va tungi soatlarda PM zarrachalari miqdori ortib, havo sifati qisqa muddatga Xalqaro havo sifati indeksi (AQI) bo‘yicha “sezgir guruhlar uchun noqulay” darajaga yetdi.
Milliy havo sifati indeksiga ko‘ra shahar o‘rtacha ko‘rsatkichi PM2.5 bo‘yicha “yashil”, PM10 bo‘yicha esa “sariq” darajada bo‘ldi.
Tunda yer yuzasiga yaqin havo qatlamida haroratning keskin pasayishi va kuchsiz shamol natijasida kuchli harorat inversiyasi shakllanib, atmosferaning quyi qatlamlarida havo almashinuvini chekladi. Natijada PM2.5 va PM10 zarrachalari yer yuzasiga yaqin qatlamda to‘planib, havo ifloslanishi tungi va tonggi soatlarda saqlanib qoldi.
Kunduzi yer yuzasi isib, inversiya zaiflashishi bilan havo sifati asta-sekin yaxshilanib borishi kutilmoqda.