O‘zbekiston Respublikasi Ekologiya va iqlim o‘zgarishi milliy qo‘mitasi

Tekshiruv davomida ma’lum bo‘ldiki, Chirchiq shahar oqova suv tozalash inshooti biologik tozalashga ixtisoslashgan bo‘lsa-da, bo‘yoq ishlatadigan to‘qimachilik va kimyoviy moddalardan foydalanadigan korxonalarning belgilangan me’yorlardan yuqori darajada ifloslangan oqova suvlarini qabul qilgan. Ustiga-ustak, oqova suvlarni tozalash jarayonlaridan biri bo‘lgan aeratsiya va cho‘kindilarni tindirish tizimida nosozliklar yuzaga kelganligi sababli tozalash inshooti samaradorligi 27,7 foizni tashkil etgan.
 

Ma’lumot uchun, Vazirlar Mahkamasining 11-son qaroriga ko‘ra, bo‘yoq va biologik tozalash jarayoniga to‘sqinlik qiluvchi zararli moddalar bilan ifloslangan oqova suvlarni oldindan tozalamasdan kommunal kanalizatsiya tizimiga oqizish taqiqlanadi. Bunday holatlar aniqlanganda, oqova suvlarni kanalizatsiyaga oqizish darhol to‘xtatilishi shart.

Shuningdek, Bo‘stonliq tumani G‘azalkent shaharchasidan qabul qilinayotgan oqova suvlar Chirchiq shahar oqova suv tozalash inshootiga tozalash uchun tashlanmasdan, to‘g‘ridan-to‘g‘ri Chirchiq daryosiga oqizilayotganligi ma’lum bo‘ldi. Holat yuzasidan Vazirlar Mahkamasining 2021-yil 12-apreldagi 202-son qarori bilan tasdiqlangan Nizomning 17-bandiga asosan kompensatsiya hisob-kitob qilindi.

Qolaversa, Vazirlar Mahkamasining 2021-yil 12-apreldagi 202-son qarori bilan tasdiqlangan Nizomning 22-bandiga muvofiq, kompensatsiya to‘lovlari bo‘yicha 2025-yil III chorak — 2026-yil II choraklari uchun hisobot topshirmaganligi uchun kompensatsiya hisob-kitob qilindi.

Bundan tashqari, O‘zbekiston Respublikasi Prezidentining 2025-yil 18-noyabrdagi “O‘zbekiston Respublikasi Ekologiya va iqlim o‘zgarishi milliy qo‘mitasi faoliyatini tashkil etish chora-tadbirlari to‘g‘risida”gi PQ–343-son qarori 6-bandiga asosan fon monitoring stansiyasi o‘rnatilmaganligi uchun ham kompensatsiya belgilandi.

Jamiyat vakillari tekshirish yakuni bo‘yicha tuzilgan dalolatnoma bilan tanishtirib chiqildi. Biroq “Toshkent viloyati suv ta’minoti” AJ Chirchiq shahar oqova suv tozalash inshootida olib borilgan tekshiruv natijalari bo‘yicha tuzilgan dalolatnomaga jamiyat rahbari imzo qo‘yishdan bosh tortdi.

Hozirda aniqlangan qonunbuzarlik bo‘yicha to‘plangan hujjatlar tegishli tartibda huquqni muhofaza qiluvchi organlarga huquqiy baho berish uchun taqdim etildi va hisoblangan kompensatsiya to‘lovlarini undirish maqsadida tegishli iqtisodiy sudga da’vo arizasi kiritish ishlari olib borilmoqda.