O‘zbekiston Respublikasi Ekologiya va iqlim o‘zgarishi milliy qo‘mitasi

Qarorga ko‘ra, issiqxona xo‘jaliklariga imtiyozlar beriladi va qo‘llab-quvvatlanadi. Xususan, faoliyatidan olgan daromadlari joriy hisobot (soliq) davri yakunlari bo‘yicha jami daromadining kamida 60 foizini tashkil etgan tadbirkorlik subyektlariga 2027-yil 1-yanvardan 2030-yil 1-yanvarga qadar yuridik shaxslardan olinadigan yer va mol-mulk soliqlari stavkalari 50 foizga kamaytiriladi. Shuningdek, aylanmadan olinadigan soliqdan ozod qilish tarzidagi soliq imtiyozi beriladi.

Shu bilan birga, 2026-yil 1-noyabrdan 2030-yil 1-aprelga qadar issiqlik energiyasini tejovchi samarador hamda ekologik toza “yashil” isitish vositalaridan (issiqlik nasoslari, geotermal isitish tizimlari, quyosh issiqlik tizimlari, elektr energiyasi asosidagi yuqori samarali isitish tizimlari) foydalanayotgan issiqxona xo‘jaliklariga oktabr–mart oylarida issiqxona faoliyati uchun iste’mol qilingan elektr energiyasi qiymatining 50 foizi miqdorida subsidiya ajratiladi.

Bundan tashqari, qarorda aholi tomorqalaridagi issiqxonalarni energiya tejamkor texnologiyalarga o‘tkazish va ekologik barqarorligini ta’minlashga ham e'tibor qaratilgan. Jumladan, Energiya samaradorligi milliy agentligi tomonidan 2030-yil 1-yanvarga qadar Toshkent viloyatining Toshkent, Zangiota, Qibray, Yangiyo‘l va To‘raqo‘rg‘on tumanlarida aholi tomorqalaridagi issiqxonalarni isitish uchun quyosh panellari, issiqlik nasoslari, infraqizil isitish moslamalari va boshqa energiya tejamkor uskunalarni xarid qilish hamda o‘rnatish xarajatlarining 40 foizi, biroq 100 million so‘mdan oshmagan miqdorda bir martalik subsidiya ajratiladi Bunda quyosh panellari uchun subsidiya ular issiqlik nasoslari, infraqizil isitish moslamalari yoki boshqa energiya tejamkor uskunalar bilan birgalikda o‘rnatilganda ajratiladi. Quyosh panellari, issiqlik nasoslari, infraqizil isitish moslamalari va boshqa energiya tejamkor uskunalarni xarid qilish va o‘rnatish Energiya samaradorligini oshirish raqamli platformasi orqali amalga oshiriladi.

Qolaversa, Kambag‘allikni qisqartirish va bandlik vazirligi tomonidan 2026-yil 1-dekabrga qadar Toshkent viloyatining Toshkent, Zangiota, Qibray, Yangiyo‘l va Yuqori Chirchiq tumanlaridagi issiqxonachilikka ixtisoslashgan 50 ta mahallada “Mahalla yettiligi” tavsiyasi asosida Ijtimoiy reyestrga kiritilgan bittadan oilaning xonadonida maydoni 4 sotixdan kam bo‘lmagan, issiqlik energiyasini tejovchi energiya samarador “yashil” isitish vositalari bilan jihozlangan issiqxonalarni tashkil etish uchun har bir oilaga 200 million so‘mgacha miqdorda subsidiya ajratiladi. Shu bilan birga, tuman hokimliklari bilan birgalikda mazkur xonadonlarda tashkil etilgan issiqxonalardan aholi uchun ko‘rgazmali o‘quv-tajriba maydonlari sifatida samarali foydalanish ta’minlanadi.

Qarorga asosan, Markaziy bank tomonidan oilaviy tadbirkorlikni rivojlantirish dasturlari doirasida Toshkent viloyatida tajriba tariqasida tomorqa va dehqon xo‘jaligiga mo‘ljallangan yer maydonlariga ega jismoniy shaxslarga “yashil” texnologiyalarga asoslangan issiqxona barpo etish uchun 300 million so‘mgacha, mavjud issiqxonalarni “yashil” texnologiyalar asosida qayta jihozlash va rekonstruksiya qilish uchun 150 million so‘mgacha imtiyozli kredit ajratiladi. Kreditlarning 100 million so‘mgacha bo‘lgan qismi garov ta’minotisiz, har bir sotix uchun 5 million so‘m qismi naqd pul shaklida beriladi.

Shuningdek, Ijtimoiy himoya milliy agentligi Energiya samaradorligi milliy agentligi bilan birgalikda 2026-yil 1-dekabrga qadar Toshkent viloyatining Toshkent, Zangiota, Qibray, Yangiyo‘l va Yuqori Chirchiq tumanlarida issiqxona tashkil etiladigan 50 ta xonadonning devor va tomlarini izolyatsiya qiladi, energiya tejamkor deraza va eshiklar hamda geliokollektorlar bilan jihozlaydi.

Tijorat banklari “Uzagrostar xolding” kompaniyasi va Toshkent viloyati hokimligi bilan birgalikda Toshkent viloyatining Toshkent, Zangiota, Qibray, Yangiyo‘l va To‘raqo‘rg‘on tumanlarida kamida 1 gektardan yer maydonlarida “yashil” texnologiyalar (quyosh panellari, issiqlik nasoslari, infraqizil isitish moslamalari va boshqa energiya tejamkor uskunalar) asosida zamonaviy issiqxonalarni tashkil etadi. Bu issiqxonalardan aholini issiqxonachilikda “yashil” texnologiyalarni qo‘llash ko‘nikmalariga o‘rgatish, energiya va suv tejovchi uskunalarni amaliyotga joriy etish hamda yuqori daromadli qishloq xo‘jaligi ekinlarini yetishtirish bo‘yicha o‘quv-tajriba maydonlari sifatida foydalaniladi.

Mazkur qaror issiqxona xo‘jaliklarida zamonaviy, energiya tejamkor va ekologik toza texnologiyalarni keng joriy etish, issiqxona xo‘jaliklarining barqaror faoliyat yuritishi uchun qulay shart-sharoitlar yaratish, shuningdek, aholi tomorqa yer maydonlaridan foydalanish samaradorligini oshirish hamda aholi daromadlarini ko‘paytirishga xizmat qiladi.