Jumladan, Zomin milliy tabiat bog‘i, Zomin davlat qo‘riqxonasi, Zarafshon milliy tabiat bog‘i, Buxoro ixtisoslashtirilgan "Jayron" pitomnigi, Hisor davlat qo‘riqxonasi, Janubiy Ustyurt, Sudoche-Akpetki, Saygachiy va Surxon davlat qo‘riqxonasi hududlari, shuningdek, Nefrit ko‘li hamda Orol dengizi manzaralari videotasvirga olindi.

Tasvirga olish jarayonida har bir hududning o‘ziga xos tabiiy manzaralari, hududga xos landshaftlar, suv havzalari, o‘simlik qoplami va hayvonot dunyosiga oid mavjud ko‘rinishlarni aks ettirishga e’tibor qaratildi. Har bir hududdan 5–6 tadan foto va videomateriallar olindi. Jamlangan materiallar hududlarning tabiiy holatini aks ettirish, ular haqida vizual ma’lumotlar tayyorlash va keyinchalik foydalanish uchun manba sifatida xizmat qiladi.

Olingan tasvirlar asosida virtual reallik (VR) formatidagi videomateriallarni tayyorlash uchun zarur vizual kontent jamlandi. Mazkur materiallar orqali muhofaza etiladigan tabiiy hududlarning o‘ziga xos xususiyatlari, tabiiy boyliklari va ekologik ahamiyatini zamonaviy vizual vositalar yordamida namoyish etish imkoniyati yaratiladi.

Shuningdek, jamlangan foto va videomateriallardan ekologik-ma’rifiy tadbirlarda, taqdimotlarda, axborot materiallarini tayyorlashda hamda muhofaza etiladigan tabiiy hududlar faoliyatini keng yoritishda foydalanish mumkin.

Amalga oshirilgan ishlar natijasida yuqorida qayd etilgan hududlar bo‘yicha foto va videomateriallar to‘plandi. Ushbu materiallar asosida VR videolarni tayyorlash va ulardan tabiatni muhofaza qilish, bioxilma-xillikni asrash hamda ekologik madaniyatni oshirishga qaratilgan axborot-ma’rifiy faoliyatda foydalanish ko‘zda tutilgan.