Davlat xizmatida qadriyat, ishonch va sog‘lom muhit masalalariga e’tibor qaratildi
2026-09-23 16:00:00 / Yangiliklar
Mazkur tadbir Respublika Ma’naviyat va ma’rifat markazi tomonidan amalga oshirilayotgan “Milliy qadriyatlarga asoslangan davlat xizmati” loyihasi doirasida tashkil etildi. Asosiy maqsad — soha xodimlari va rahbar kadrlarda yurtga muhabbat, burchga sadoqat, kasbiy etika hamda milliy qadriyatlarga hurmat tuyg‘ularini yanada mustahkamlashdan iboratdir.
Tadbirda yuqori malakali ekspertlar tomonidan maxsus ishlab chiqilgan dastur asosida ma’ruzalar qilindi, zamonaviy boshqaruv psixologiyasi va davlat xizmatida axloqiy me’yorlarga rioya etishning ahamiyati haqida fikr almashildi. Mashg‘ulotlar davomida davlat xizmatchilarining ish jarayonidagi ruhiy barqarorligi va psixologik farovonligini ta’minlash, jamoada sog‘lom muhitni shakllantirish hamda fuqarolar bilan ishlashda ochiqlik va ishonch tamoyillariga tayanish masalalariga alohida urg‘u berildi.
Yakunda ishtirokchilar o‘rtasida maxsus so‘rovnoma o‘tkazildi. Ushbu so‘rovnoma natijalari xodimlarning ma’naviy va psixologik ehtiyojlarini tizimli o‘rganish hamda kelgusida davlat xizmatida boshqaruv samaradorligini yanada oshirishga xizmat qiladi.