"Markaziy Osiyoda iqlimga bardoshli landshaftlar” mintaqaviy dasturi ishlab chiqilmoqda
2026-09-23 10:00:00 / Yangiliklar
Dastur qishloq xo‘jaligi, o‘rmonchilik va boshqa yerdan foydalanish (AFOLU) sohalarining iqlim o‘zgarishiga bardoshliligini oshirish va issiqxona gazlari emissiyasini kamaytirishga qaratilgan. O‘zbekistonda dastur faoliyati, xususan, Farg‘ona vodiysi va Surxondaryo viloyati hududlarini qamrab olishi ko‘zda tutilgan.
Dastur doirasida iqlimga oid ma’lumotlardan yer resurslaridan foydalanishni rejalashtirish hamda investitsiyalarni jalb qilish jarayonlarida foydalanish, barqaror qishloq xo‘jaligi amaliyotlarini joriy etish, yaylov va o‘rmonlarni tiklash, qishloq hududlaridagi kichik va o‘rta biznesning iqlimiy moliyalashtirish imkoniyatlarini kengaytirish hamda davlat tashkilotlari va yer resurslaridan foydalanuvchilarning salohiyatini oshirish nazarda tutilgan. Shuningdek, dastur transchegaraviy hamkorlik, bilim va tajriba almashinuvi hamda mintaqaviy investitsiyalarni muvofiqlashtirishni kuchaytirishga hissa qo’shadi.
Dastur GIZ tomonidan uch mamlakatdagi sohaviy tashkilotlar bilan hamkorlikda amalga oshirilishi rejalashtirilgan. O‘zbekistonda amalga oshirish bo’yicha milliy hamkor tashkilot sifatida O‘zbekiston Respublikasi Ekologiya va iqlim o‘zgarishi milliy qo‘mitasi ishtirok etadi. Dasturni Yashil Iqlim Jamg‘armasi, Germaniya Iqtisodiy hamkorlik va taraqqiyot federal vazirligi (BMZ) mablag‘lari hamda ishtirokchi davlatlarning hissalari hisobidan moliyalashtirish ko‘zda tutilgan.
Mazkur dastur orqali uch mamlakatda 1 milliondan ortiq aholining iqlim o‘zgarishiga bardoshliligini bevosita oshirish, qariyb 939 ming gektar yer maydonida barqaror boshqaruv va qayta tiklash choralarini amalga oshirish, shuningdek, 6,95 million tonna CO₂ ekvivalentidagi issiqxona gazlari emissiyasini kamaytirishni ta’minlash rejalashtirilgan.
Dasturni tayyorlash jarayonida uning ekologik va ijtimoiy ta’sirlari hamda tegishli xavflarni boshqarish choralarini aniqlash maqsadida Ekologik va ijtimoiy ta’sirni baholash (Environmental and Social Impact Assessment – ESIA) hamda Ekologik va ijtimoiy boshqaruv rejasi (Environmental and Social Management Plan – ESMP) hujjatlari ishlab chiqildi. Manfaatdor tomonlar va keng jamoatchilikni dastur bo‘yicha tegishli ekologik va ijtimoiy ma’lumotlar bilan yaqindan tanishtirish maqsadida mazkur hujjatlar jamoatchilik uchun e’lon qilinmoqda va quyida taqdim etilmoqda.
