Özbekiston Respublikasi Ekologiya va iqlim özgarişi milliy qömitasi

Tadbirda Ekologiya qo‘mitasi ijro apparati rahbari O‘tkir Jumanov, qo‘mita raisi maslahatchisi Matnazar Elmurodov, Respublika ma’naviyat va ma’rifat markazi vakillari, tarix fanlari doktori Farhod Ochilov va Pardaxol Norqobilova, Ekologiya qo‘mitasi, tizim tashkilotlari va hududiy bosh boshqarmalar xodimlari ishtirok etdi.

Tadbirda Prezident nutqida barcha sohalar, xususan, atrof-muhitni muhofaza qilishga alohida e’tibor qaratilganligi ta’kidlandi. Xususan, mamlakatimiz taraqqiyotning mutlaqo yangi davriga qadam qo‘yayotgani, kelgusi o‘n yillik biz uchun milliy yuksalish davri bo‘lishi, bunda suv va tabiatga munosabatni tubdan o‘zgartirish muhim o‘rin tutishi qayd etildi.

"Kelgusi besh yilda ekin maydonlarida suv tejaydigan texnologiyalar qamrovini 100 foizga olib chiqamiz. Bu umummilliy marraga aylanadi. Tabiatga munosabat – xalqning madaniyati, davlatning mas’uliyati va taraqqiyotning sifat ko‘rsatkichidir. Shuning uchun mamlakatimizda “Yashil makon” umummilliy harakatini yangi sifat bosqichiga olib chiqamiz. Maktab, bog‘cha, shifoxona va ko‘p qavatli uylar atrofidagi yashil hududlar jamiyatning daxlsiz boyligi sifatida muhofaza qilinadi. Yaqin yillarda tuman va shahar markazlarida yashillik ko‘lamini 30 foizga yetkazamiz", – deyiladi nutqda.

Tadbir davomida Yangi O‘zbekiston taraqqiyot yo‘liga bag‘ishlangan vodeorolik namoyish etildi. Shuningdek, O‘zbekiston mustaqilligi 1991-yilda paydo bo‘lgan emas, aksincha, istiqlol ildizlari uch ming yildan ziyod davlatchilik an’analari va qadimiy sivilizatsiya tarixiga borib taqalishi ta’kidlandi. Birinchi va Ikkinchi Renessans davrida yashab o‘tgan buyuk allomalar (Muhammad Xorazmiy, Beruniy, Ibn Sino, Mirzo Ulug‘bek, Alisher Navoiy) hamda Sohibqiron Amir Temurning adolat va bunyodkorlikka asoslangan davlatchilik roli e’tirof etildi. Qolaversa, mustaqillik xalqimizga o‘z shon-sharafi, muqaddas dini, ona tili va milliy qadriyatlarini qaytargani, valyuta, soliq, bojxona va investitsiya siyosatida amalga oshirilgan tub o‘zgarishlar O‘zbekistonning “iqtisodiyoti mo‘tadil erkin” davlatlar qatoridan joy olishini ta’minlagani ta’kidlandi.

Bundan tashqari, nutqda kelajakdagi ustuvor vazifalar ham belgilab berilgan. Jumladan, kelgusi yillarda yurtimizda inson qadrini yanada yuksaltiradigan 7 ta milliy dastur amalga oshiriladi: bilim va malaka kelgusi taraqqiyotimizning asosiy kapitaliga aylantiriladi, xalqimizning sog‘lom bo‘lishi va uzoq umr ko‘rishi ta’minlanadi, iqtisodiyotimiz yuqori texnologiya va mehnat unumdorligi modeliga o‘tkaziladi, suv va tabiatga munosabat tubdan o‘zgartiriladi, sud mustaqilligini kuchaytirish va qonun ustuvorligini ta’minlash umumiy qadriyatga, mahallalar jamiyat taraqqiyotining asosiy buyurtmachisiga aylanadi.

Xulosa qilib aytganda, O‘zbekistonning 35 yillik mustaqil taraqqiyot yo‘li xalqimizning birdamligi, mehnati va bunyodkorlik salohiyati bilan bog‘liq ulkan yutuqlarni namoyon etdi. Endi mamlakat oldida ta’lim, sog‘liqni saqlash, yuqori texnologiyalar, iqtisodiyot, ekologiya va suv resurslarini asrash, qonun ustuvorligi, mahalla va xalqaro hamkorlikni rivojlantirishga qaratilgan yangi strategik vazifalar turibdi. Kelgusi davrda inson qadri, xalq farovonligi va milliy taraqqiyot ustuvor yo‘nalish bo‘lib, O‘zbekiston yanada kuchli, obod, tinch va farovon davlat sifatida rivojlanadi.