O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi

Koreya Respublikasining O‘zbekistondagi Favqulodda va muxtor elchisi Von Do Yon bilan uchrashuvda vazir ikki davlat o‘rtasidagi hamkorlik yangi bosqichga ko‘tarilayotganini ta’kidlab, KEITI (Koreya atrof-muhit sanoati va texnologiyalari instituti) bilan O‘zbekistonda qattiq maishiy chiqindilarni boshqarish tizimini takomillashtirish bo‘yicha qo‘shma loyiha muvaffaqiyatli yakunlanganini alohida ta’kidladi. Shuningdek, “Sejin G&E Co. Ltd” kompaniyasi bilan maishiy chiqindi poligonlarida hosil bo'ladigan chiqindi gazidan muqobil elektr energiyasi ishlab chiqarishga qaratilgan qo‘shma loyihani amalga oshirish istiqbollari ham qayd etildi.

Marokash Qirolligining O‘zbekistondagi Favqulodda va muxtor elchisi Muhammad Odil Embarsh bilan uchrashuvda O‘zbekiston tomoni turizm sohasida hamkorlikni rivojlantirish va ikki davlat o‘rtasida viza tartibini soddalashtirishdan manfaatdor ekanligini bildirdi. Shuningdek, BMTning iqlim o‘zgarishi bo‘yicha konferensiyasida (COP29) ishtirok etish doirasida atrof-muhitni muhofaza qilish sohasida hamkorlikni rivojlantirish bo‘yicha o‘zaro anglashuv memorandumini imzolash masalalari ham muhokama qilindi.

Gruziyaning Oʻzbekistondagi Muvaqqat ishlar vakili David Kotaria bilan oʻtkazilgan ikki tomonlama uchrashuv doirasida amaldagi qonunchilikni o‘rganish sohasida ikki davlat o‘rtasidagi hamkorlik, atrof-muhitga ta'sirni baholash va strategik ekologik baholash mexanizmlari, muhofaza etiladigan tabiiy hududlarni boshqarish va ekoturizmni rivojlantirish, Orxus markazini yaratish uchun xalqaro talablarni o'rganish borasidagi hamkorlik toʻgʻrisida kelishuvga erishildi. Ekologiya sohasida oliy ta’lim borasidagi hamkorlik masalalari ham muhokama qilindi. Bu yoʻnalishda Gruziya tomoniga Markaziy Osiyo atrof-muhit va iqlim oʻzgarishini o‘rganish universiteti ("Green University") hamda Samarqanddagi “Ipak yoʻli” xalqaro turizm va madaniy meros universitetida maʼruzalar, seminarlar va treninglar oʻtkazish uchun oʻqituvchi va professorlarni jalb qilish taklif etildi.

Mamlakatimizda o‘z missiyasini yakunlayotgan Misrning O‘zbekistondagi Favqulodda va muxtor elchisi Amira Fahmi bilan xayrlashuv uchrashuvida O‘zbekiston tomoni mamlakatimizda ekologiya va atrof-muhitni muhofaza qilish sohasida amalga oshirilayotgan islohotlar haqida ma’lumot berdi. Xususan, Prezident Shavkat Mirziyoyev rahnamoligida ekologik muammolarga qarshi kurashish bo‘yicha qator ekologik tashabbuslar, jumladan, Orol dengizi tubida 2 million gektar maydonda o‘rmonzorlar barpo etish, “Yashil makon” milliy loyihasini amalga oshirish, Prezident huzurida iqlim markazini tashkil etish va boshqa tashabbuslar haqida ma'lumot berildi. Shuningdek, O‘zbekiston va Misr o‘rtasidagi ekologiya sohasidagi hamkorlik uchun minnatdorlik bildirilib, ekologik loyihalarni amalga oshirishda tajriba almashish muhimligi ta’kidlandi.

O‘tkazilgan barcha uchrashuvlar O‘zbekistonning atrof-muhitni muhofaza qilish va iqlim o‘zgarishiga qarshi kurashish sohasida xalqaro hamkorlikni kengaytirish istagini namoyon etdi. Xorijiy hamkorlar bilan birgalikdagi sa’y-harakatlarni kuchaytirish, ekologik loyihalarni amalga oshirish va ilg‘or tajriba almashish mintaqadagi ekologik vaziyatni yaxshilash va mamlakatning barqaror rivojlanishini ta’minlashga xizmat qiladi.