O‘zbekiston Respublikasi Ekologiya va iqlim o‘zgarishi milliy qo‘mitasi

Uchrashuvda Aziz Abduhakimov iqlim o‘zgarishi oqibatlari, ayniqsa, iqlim migratsiyasi, chang bo'ronlari va iqlim bilan bog'liq sog'liq muammolari tobora murakkablashib borayotgan  Markaziy Osiyo mintaqasida sezilarli ekanligini ta'kidladi. Shuningdek, nogironligi bor shaxslarning huquqlarini ta’minlash masalasiga taalluqli barcha sohalarda iqlim o‘zgarishining salbiy oqibatlarini yumshatish choralari ko‘rilayotgani alohida qayd etildi.

Yig‘ilishda iqlim o‘zgarishining nogironligi bor shaxslarga nomutanosib ta’siri ham muhokama qilindi. A.Abduhakimov jamiyatimizning muhim bo‘lagi bo‘lgan nogironligi bor shaxslarning hissasini hisobga olmasdan turib, barqaror rivojlanishga erishib bo‘lmasligini ta’kidladi.

Uchrashuv davomida noqulay muhitdan qochish maqsadida nogironligi bor shaxslar sayohat qila olmasligi mumkinligiga e'tibor qaratildi. Bu yoʻnalishda vazir Oʻzbekiston tashabbusi bilan UNWTOning inklyuziv turizm boʻyicha rezolyutsiyasi qabul qilinganini alohida qayd etdi.

O‘z navbatida S.Minkara nogironligi bo‘lgan shaxslar uchun turizmning inklyuzivligi va undan foydalanish imkoniyatini ta’minlash muhimligini hamda butun mamlakat bo‘ylab tegishli sharoitlar yaratish zarurligini ta’kidladi. AQSh Prezidentining maxsus maslahatchisi bu borada barcha texnik yordam ko‘rsatish, jumladan, turli tadbirlar, seminarlar, treninglar va forumlar o‘tkazish, shuningdek, nogironligi borlarning muammolari haqida aholini keng xabardor qilishga tayyorligini bildirdi.

Uchrashuv yakunida tomonlar AQSH oliy taʼlim muassasalari, Toshkent shahridagi Markaziy Osiyo atrof-muhit va iqlim oʻzgarishini o‘rganish universiteti ("Green University") hamda Samarqand shahridagi “Ipak yoʻli” turizm va madaniy meros xalqaro universiteti bilan hamkorlikda ushbu yoʻnalishda tadbirlar oʻtkazish borasida hamkorlikni yo‘lga qo‘yishga kelishib oldilar.