Oppoq cho'l bo'ylab yugurish: Borsakelmasdagi eko-marafon xalqaro jamoatchilik e'tiborini jalb qildi
2024-09-16 10:35:00 / Yangiliklar
Tadbir Ekologiya, atrof-muhitni muhofaza qilish va iqlim o‘zgarishi vazirligi tomonidan ProRun yugurish maktabi hamda "O‘zbekneftgaz" AJ bilan hamkorlikda tashkil etildi.
Joriy yilda marafonda rekord darajadagi – O‘zbekiston, Hindiston, Keniya, Togo, Sudan, Iordaniya, Ispaniya, Kanada, Daniya, Belarus, Rossiya kabi 11 davlatdan 250 nafar professional va havaskor yuguruvchi ishtirok etdi. Yuguruvchilar orasida Nike kompaniyasining musulmon ayollar o'rtasida yugurishni targ'ib qiluvchi elchisi Farah Majid va Adidas vakili G'ani Sulaymon bor. Ishtirokchilarning turli davlatlardan ekanligi tadbirning xalqaro maqomga ega ekanligini va tobora ommalashib borayotganini ko‘rsatadi.
Ishtirokchilar xavfsizligi va qulaylikni ta’minlash maqsadida marafonni tashkil etishga 200 kishi jalb etildi. Ikki kunlik tadbir dasturida o‘tov lagerida joylashtirish, madaniy dastur, etno-shou, Borsakelmas sho‘rxok hududiga sayohat, 42 km marafon, 21 km yarim marafon va 5 hamda 10 km masofaga yugurish o‘rin oldi.
Ta'kidlash joizki, Borsakelmas marafoni nafaqat sport tadbiriga, balki inson va tabiat birligining haqiqiy bayramiga aylandi. U sport nafaqat musobaqa, balki atrofimizdagi hayratlanarli olamni kashf etish va uni asrab-avaylashga hissa qo‘shish vositasi bo‘lishi mumkinligini isbotladi. Ushbu marafon yuguruvchilarni, ekoturistlarni va atrof-muhitga g'amxo'rlik qilayotganlarni sayyoradagi noyob joylarni saqlash uchun yagona harakatga birlashtirdi. Ishtirokchilarga haqiqatan ham muhim bo'lgan tabiatimizni qo'llab-quvvatlab, o'z kuch va matonatini namoyish qilish imkoniyati berildi.
Tashkilotchilar Borsakelmas marafoni har yili oʻtkaziladigan tadbirga aylanib, ishtirokchilar va eʼtiborni ekologik muammolar va noyob tabiiy obyektlarni asrab-avaylash masalalariga tobora koʻproq jalb etishiga umid bildirishdi.
Ma'lumot uchun, Orol dengizi muammosiga dunyo hamjamiyati e'tiborini jalb qilish maqsadida doimiy tarzda o‘tkazib boriladi. Xususan, 18-aprel kuni “Aral Sea Eco Race” eko-marafoni, 23-iyun kuni esa “Aral Sea Eco Marathon” (“Orol dengizida eko-marafon”) o‘tkazildi. Bunday marafonlar har yili tashkil etiladi va ekologik targ‘ibotni yanada kuchaytirish, ekomadaniyatni oshirishda muhim ahamiyat kasb etadi.