Mustaqillik yillarida mamlakatimiz ulkan taraqqiyot yo‘lini bosib o‘tdi, xalqaro maydondagi nufuzini yanada mustahkamladi va islohotlar hamda barqaror rivojlanish yo‘lidan izchil odimlamoqda.

Bugun oldimizda yangi va keng ko‘lamli vazifalar turibdi. O‘zbekiston Respublikasi Prezidenti Shavkat Mirziyoyev davlat mustaqilligining 35 yilligiga bag‘ishlangan tantanali marosimdagi nutqida ta’kidlaganidek, global iqlim o‘zgarishi sharoitida suv va ekologiya masalalari tobora dolzarb ahamiyat kasb etmoqda. Shu munosabat bilan tabiiy resurslar va atrof-muhitga ehtiyotkorona munosabatni shakllantirish alohida ahamiyatga ega.

Yaqin yillarda mamlakatimizda suv resurslaridan oqilona foydalanish, suv tejovchi texnologiyalarni joriy etish hamda «Yashil makon» umummilliy harakatini rivojlantirish bo‘yicha keng ko‘lamli ishlar izchil davom ettiriladi. Yashil hududlarni kengaytirish, tabiiy merosimizni asrab-avaylash va jamiyatda ekologik madaniyatni yuksaltirishga alohida e’tibor qaratiladi.

Tabiatga ehtiyotkorona munosabat — nafaqat davlatning mas’uliyati, balki har birimizning umumiy madaniyatimiz va fuqarolik burchimizdir. Birgalikda O‘zbekistonni yanada yashil, toza va bugungi hamda kelajak avlodlar uchun qulay mamlakatga aylantira olamiz.

Barchangizga mustahkam sog‘lik, oilaviy xotirjamlik, tinchlik, baxt-saodat va yangi muvaffaqiyatlar tilaymiz! Mustaqil O‘zbekiston taraqqiy etib, yuksalib boraversin, Vatanimiz doimo kuchli, tinch va farovon bo‘lsin!

Aziz Abduhakimov boshchiligidagi Ekologiya va iqlim o‘zgarishi milliy qo‘mitasi jamoasi.