O‘zbekiston Respublikasi Ekologiya va iqlim o‘zgarishi milliy qo‘mitasi

Unda Ekologiya va iqlim o’zgarishi milliy qo’mitasi boshqarma boshlig’i Zarrina Abdullayeva, Qashqadaryo viloyati hokim o’rinbosari Ziyoda Aminova, mas’ul tashkilotlar, mahalliy va xorijlik yoshlar hamda ommaviy axborot vositalari vakillari ishtirok etdi.

Tadbirda Zarrina Abdullayeva qurultoy ishtirokchilariga Ekologiya milliy qo’mitasi raisi Aziz Abduhakimovning tabrigini yetkazdi. Unda bugungi kunda ekologik masalalar tobora dolzarb tus olib borayotgani va bu borada yoshlarning tashabbuslari, faolligi muhim ahamiyatga ega ekanligi ta’kidlandi. Shuningdek, qurultoy mahalliy va xorijlik yoshlarni atrof-muhitni asrashdek ezgu maqsad yo’lida birlashtirishi qayd etildi. Ziyoda Aminova ham aynan yoshlarning g’oyalari ekologik muammolarga yechim topishda muhim ekanligini aytib o’tdi.

Ochilish marosimida har bir hududdagi “Yosh ekologlar” harakati kengashlari raislariga ishonch yorliqlari topshirildi. Tadbirga elimiz suygan san’atkorlar ijrosidagi diltortar taronalar ko’tarinki kayfiyat ulashdi.

Ma’lumot uchun, qurultoyda Qozog’iston, Qirg’iz Respublikasi, Tojikiston, Turkmaniston, Ozarbayjon, Turkiya, Rossiya, Belarus Respublikalari hamda respublikamizning barcha hududlaridan jami 1000 ga yaqin yosh eko-faollar ishtirok etmoqda.

Qurultoy doirasida bir qator tanlov va musobaqalar, taqdimot va ko‘rgazmalar, uchrashuvlar, plogging va aksiyalar, loyiha hamda tadbirlar bo‘lib o‘tadi. Shu bilan bir qatorda, qurultoydan “Eng yaxshi ekologik loyiha”, “Eng yaxshi “Yosh ekologlar” harakati Kengashi”, “Eko-zakovat” va “Quvnoqlar va zukkolar” xalqaro musobaqalari va boshqa tanlovlar o‘rin olgan.

Xalqaro qurultoy yoshlarning ekologiya va ijtimoiy-iqtisodiy sohalardagi faolligini oshirish, ularni ekologiyani asrab-avaylashga keng jalb etish, ekologiya sohasidagi istiqbolli gʻoyalar hamda loyihalarini ro‘yobga chiqarish, ekologik muammolar va ularning yechimlariga bag‘ishlangan takliflar ishlab chiqishga xizmat qiladi.