Mazkur uchirish milliy gidrometeorologiya xizmatini rivojlantirish hamda atmosfera holatini o'rganish imkoniyatlarini kengaytirish yo'lidagi muhim qadam bo'ldi. Yangi texnologiya atmosferaning yuqori qatlamlarida kechayotgan jarayonlar haqida yanada to'liq ma'lumot olish imkonini yaratadi. Bu esa, o'z navbatida, ob-havo prognozlari aniqligini oshirishga xizmat qiladi.

Aerologik sharga o'rnatilgan meteozond turli balandliklarga ko'tarilish jarayonida asosiy meteorologik ko'rsatkichlarni real vaqt rejimida o'lchab, yer usti qabul stansiyasiga uzatadi. Ular qatoriga havo harorati va namligi, atmosfera bosimi, shamolning tezligi hamda yo'nalishi kiradi.

Olingan ma'lumotlar mutaxassislarga atmosferaning turli balandliklardagi holatini tahlil qilish va ushbu axborotdan sinoptik tahlillarni amalga oshirishda foydalanish imkonini beradi.

Aerologik kuzatuvlar ob-havo prognozlari aniqligini oshirish va xavfli gidrometeorologik hodisalarni barvaqt aniqlashda alohida ahamiyat kasb etadi. Bundan tashqari, atmosfera holati to'g'risidagi ishonchli ma'lumotlar aviatsiya, qishloq xo'jaligi, transport hamda iqtisodiyotning boshqa muhim tarmoqlarini meteorologik axborot bilan ta'minlash uchun zarur hisoblanadi.

Buxoro viloyatida aerologik sharning ilk muvaffaqiyatli uchirilishi mamlakatda gidrometeorologik kuzatuvlar tizimini yanada takomillashtirish va atmosferani o'rganishning zamonaviy usullarini joriy etish uchun qo'shimcha imkoniyatlar yaratadi.

Aerologik kuzatuvlarni rivojlantirish natijasida yanada aniq va tezkor meteorologik ma'lumotlarni shakllantirish imkoniyati kengayishi kutilmoqda. Bu esa iqlim o'zgarishi va xavfli ob-havo hodisalari soni ortib borayotgan bugungi sharoitda ayniqsa muhim ahamiyatga ega.