O‘zbekiston Respublikasi Ekologiya va iqlim o‘zgarishi milliy qo‘mitasi

JSST maʼlumotlariga koʻra, tibbiyot chiqindilarining 15 foizi xavfli hisoblanib, ularning notoʻgʻri boshqarilishi kasalliklar tarqalishi, zaharlanish va atrof-muhit ifloslanishiga olib kelishi mumkin.

Oʻrganishlarda ayrim muassasalarda xavfli chiqindilar maishiy chiqindilar bilan aralashtirilib, poligonlarga yoki belgilanmagan joylarga tashlangani maʼlum boʻldi.

Oʻzbekiston Prezidentining 2024-yil 17-iyuldagi 263-sonli qarori ijrosini taʼminlash maqsadida AQSHning “SAYAR LLC” kompaniyasi tomonidan “Sayar green” xorijiy korxonasi taʼsis etilib, umumiy qiymati 115 mln AQSH dollari boʻlgan investitsiya loyihasi amalga oshirilmoqda. Biroq tibbiyot muassasalari xavfli chiqindilarni investorga yetkazmayotgani sababli mexanizm toʻliq ishlamayapti.

Misol uchun, Toshkent shahrida oʻrnatilgan 2 ta uskunaning umumiy kunlik quvvati 12 tonnani tashkil etsa-da, amalda ularga kuniga atigi 3 tonna chiqindi yetkazib berilib, uskunalar bor-yoʻgʻi 25 foiz quvvatda ishlamoqda.

Maxsus komissiyaning 2026-yilning 6 oyi davomidagi oʻrganishlarida jami 3 239,05 m³ tibbiyot chiqindisi olib chiqilgani aniqlandi. Poytaxtda eng koʻp chiqindi chiqargan muassasalar qatoriga 16-sonli klinik shifoxonasi (1795,40 m³), 3-sonli yuqumli kasalliklar klinik shifoxonasi (445,44 m³) va Virusologiya ITI klinikasi (382 m³) kirdi.

Shuningdek, respublika bolalar ftiziatriya va tayanch-harakat tizimi kasalliklari reabilitatsiya markazi, dermatovenerologiya va kosmetologiya markazi Toshkent shahri filiali, 1-sonli yuqumli kasalliklar klinik shifoxonasi, ftiziatriya va pulmonologiya ilmiy-amaliy tibbiyot markazi hamda teri-tanosil kasalliklari shifoxonasida xizmatlar qonunchilikda belgilangan tartibda amalga oshirilmagan.

Huquqbuzarlik holatlari boʻyicha masʼullarga tegishli choralar koʻrilmoqda. Shuningdek, Maxsus komissiya hamda huquqni muhofaza qiluvchi organlar tomonidan bu kabi nazorat tadbirlari butun respublika boʻyicha oʻtkazilmoqda.