Chiqindilar bilan ishlash sohasi va ekologik tashabbuslarni rivojlantirish masalalari Jamoatchilik kengashi yig'ilishida muhokama qilindi
2026-08-07 19:25:00 / Yangiliklar
Chiqindilarni boshqarish va sirkulyar iqtisodiyotni rivojlantirish agentligi faoliyati haqida Agentlik direktori Sharifbek Hasanov ma'ruza qildi. U 2026-yilning birinchi yarim yilligida erishilgan natijalar hamda sohani yanada rivojlantirishning ustuvor yo'nalishlari haqida ma'lumot berdi.
Xususan, hisobot davrida chiqindilarni boshqarish tizimini takomillashtirish, davlat-xususiy sheriklikni rivojlantirish va investitsiyalarni jalb etishga qaratilgan 15 ta normativ-huquqiy hujjat qabul qilingani qayd etildi. Aholining sanitariya tozalash xizmatlari bilan qamrovi 80 foizdan 90 foizga yetkazildi, sohani raqamlashtirish ishlari davom ettirilmoqda, chiqindilarni qayta ishlash quvvatlari kengaytirilmoqda, chiqindilardan elektr energiyasi ishlab chiqarishga qaratilgan yirik investitsiya loyihalari amalga oshirilmoqda, shuningdek, sirkulyar iqtisodiyot tamoyillarini joriy etish bo'yicha ishlar olib borilmoqda.
Yig'ilishda joriy yil oxirigacha amalga oshirilishi rejalashtirilgan vazifalarga ham alohida e'tibor qaratildi. Jumladan, "Chiqindilar to'g'risida"gi Qonunning yangi tahririni qabul qilish, 2026–2030-yillarga mo'ljallangan Sanitariya tozalash va sirkulyar iqtisodiyotni rivojlantirish milliy strategiyasini ishlab chiqish, "Chiqindisiz O'zbekiston" loyihasini ishga tushirish, chiqindilarni alohida yig'ish infratuzilmasini rivojlantirish, yangi qayta ishlash korxonalarini tashkil etish hamda maishiy va qurilish chiqindilari bilan bog'liq barcha jarayonlarni raqamlashtirish rejalashtirilgan.
Yig'ilish davomida Jamoatchilik kengashi a'zolari qator ijtimoiy ahamiyatga ega loyihalarni ham ko'rib chiqdilar.
Jumladan, "Ekolog" jamoat birlashmasining "O'zbekiston sudralib yuruvchilarini ma'rifat, media va jamoatchilik ishtiroki orqali asrash" loyihasi taqdim etildi. Mazkur loyiha aholining sudralib yuruvchilarning ekotizimdagi o'rni haqidagi xabardorligini oshirish, biologik xilma-xillikka ehtiyotkorona munosabatni shakllantirish hamda fuqarolarni tabiatni muhofaza qilish faoliyatiga jalb etishga qaratilgan.
Shuningdek, yig'ilish ishtirokchilariga Respublika ekologik-resurs markazi "Ekomaktab"ning "Ekomahalla" hamda "Qalb ekologiyasi" NNTning "Toza mahalla – barqaror jamiyat" loyihalari ham taqdim etildi. Ushbu loyihalar ekologik madaniyatni rivojlantirish, mahallalar va ta'lim muassasalarida ekologik amaliyotlarni joriy etish, shuningdek, aholini atrof-muhitni muhofaza qilish masalalarini hal etishga keng jalb etishni nazarda tutadi.
Yig'ilish yakunida Jamoatchilik kengashi a'zolari taqdim etilgan tashabbuslar yuzasidan fikr almashdilar, ularni yanada takomillashtirish bo'yicha takliflar bildirdilar hamda ekologik muammolarni samarali hal etish va mamlakatda sirkulyar iqtisodiyotni rivojlantirishda davlat organlari, fuqarolik jamiyati institutlari va jamoatchilik sa'y-harakatlarini birlashtirish muhimligini ta'kidladilar.