O‘zbekiston Respublikasi Ekologiya va iqlim o‘zgarishi milliy qo‘mitasi

Aksiyada Ekologiya va iqlim o‘zgarishi milliy qo'mitasining hududiy bo'linmalari hamda muhofaza etiladigan tabiiy hududlar xodimlari, kommunal xizmatlar, korxona va tashkilotlar vakillari, mahalla faollari, volontyorlar va keng jamoatchilik ishtirok etmoqda.

Jumladan, Surxondaryo viloyatida 431 tonna maishiy chiqindi olib chiqildi, ishlarga 419 ta maxsus texnika jalb etildi. Jizzax viloyatida daraxtlar tozalanib sug'orildi, xiyobonlar va ularga tutash hududlar obodonlashtirildi. Xorazm viloyatida suv havzalari tozalanib, hasharlar tashkil etildi, yangi ko'chatlar ekildi va yashil hududlarni parvarishlash ishlari amalga oshirildi. Qashqadaryo viloyatida esa daraxtlarni sug'orish, tanalarini oqlash va hududlarni sanitariya tozalash ishlari olib borilmoqda.

Navoiy viloyatida ariqlar va jamoat joylari tozalanmoqda, Andijon viloyatida ko'chalar hamda yo'l yoqalari obodonlashtirilmoqda, Farg'ona viloyatida esa hasharlar va jamoat joylarini tozalash ishlari davom etmoqda. Toshkent shahrida obodonlashtirish ishlari bilan bir qatorda ekologik qonunchilik talablariga rioya etilishi yuzasidan reyd tadbirlari o'tkazilmoqda. Buxoro viloyatida avariya holatidagi va qurib qolgan daraxtlarni olib tashlash bo'yicha sanitariya ishlari olib borilmoqda. Qoraqalpog'iston Respublikasida ko'chalar, ariqlar va kollektor-drenaj tarmoqlarini tozalash ishlari davom etayotgan bo'lsa, Samarqand viloyatida mahallalarni obodonlashtirish bo'yicha ommaviy hasharlar tashkil etilmoqda.

Shu bilan birga, barcha hududlarda ekologik huquqbuzarliklarning oldini olish, chiqindilarni noqonuniy tashlash holatlariga chek qo'yish hamda sanitariya tartibini ta'minlashga qaratilgan nazorat-reyd tadbirlari kuchaytirildi.

Muhofaza etiladigan tabiiy hududlarda ham alohida e'tibor qaratilmoqda. Jumladan, "Oqtog'-Tomdi" davlat qo'riqxonasi, Surxon va Zomin davlat qo'riqxonalari, "Sayg'oq" buyurtma qo'riqxonasi, Zarafshon, Xorazm, Orolqum va "Janubiy Ustyurt" milliy tabiat bog'lari, Quyi Amudaryo davlat biosfera rezervati hamda boshqa muhofaza etiladigan tabiiy hududlarda sanitariya tozalash, obodonlashtirish, yashil hududlarni parvarishlash va ekologik barqarorlikni saqlashga qaratilgan ishlar amalga oshirilmoqda.

"Dolzarb 40 kunlik" aksiyasi 6-sentabrga qadar davom etadi. Aksiya toza va qulay yashash muhitini yaratish, aholining ekologik madaniyatini yuksaltirish hamda atrof-muhitni muhofaza qilish yo'lida jamiyat sa'y-harakatlarini birlashtirishga xizmat qiladi.