O‘zbekiston Respublikasi Ekologiya va iqlim o‘zgarishi milliy qo‘mitasi

Ochiq muloqotning asosiy maqsadi mavjud muammolarni shunchaki muhokama qilish emas, balki ularning sabablarini aniqlash hamda biznes vakillari bilan o'zaro ishonch va davlat hamda tadbirkorlar o'rtasidagi konstruktiv hamkorlik asosida amaliy yechimlarni birgalikda ishlab chiqishdan iborat bo'ldi.

Uchrashuvda so'zga chiqqan Aziz Abduhakimov davlat siyosatining ustuvor yo'nalishlaridan biri qonuniy va mas'uliyatli tadbirkorlikni rivojlantirish uchun qulay sharoitlar yaratish bilan birga atrof-muhitni ishonchli muhofaza qilishdan iborat ekanini ta'kidladi. A. Abduhakimov qayd etganidek, ekologik talablar iqtisodiy rivojlanishga g'ov bo'lmaydi, aksincha, zamonaviy resurs tejamkor texnologiyalarni joriy etish, chiqindilarni qayta ishlashni rivojlantirish, suv resurslaridan takroriy foydalanish va ekologik toza energiya manbalariga o'tishga xizmat qiladi, bu esa korxonalarning raqobatbardoshligini oshiradi hamda yangi ish o'rinlarini yaratadi.

Uchrashuv davomida tadbirkorlar ekologik talablarga rioya qilish, davlat ekologik ekspertizasidan o'tish, ruxsat berish tartib-taomillari, chiqindilar bilan ishlash, tabiat resurslaridan foydalanish va biznes yuritishning boshqa jihatlari bilan bog'liq masalalarni ko'tardilar. Har bir murojaat bo'yicha mutaxassislar kerakli tushuntirishlar, tavsiyalar berdilar hamda ko'tarilgan masalalarni tezkor hal etish yo'llarini ko'rib chiqdilar.

Ochiq muloqot davomida davlat va biznes o'rtasidagi hamkorlik mexanizmlarini takomillashtirish masalasiga alohida e'tibor qaratildi. Ta'kidlanganidek, davlat organlari faoliyati samaradorligining asosiy mezoni ekologik huquqbuzarliklarning oldini olish, qonunchilik talablarini o'z vaqtida tushuntirish hamda aniqlangan kamchiliklarni ixtiyoriy bartaraf etish uchun sharoit yaratish bo'lishi lozim. Jarima sanksiyalari esa faqat qasddan sodir etilgan, takroriy yoki jiddiy ekologik zarar yetkazgan holatlarda qo'llanishi kerak.

Shuningdek, so'nggi yillarda mamlakatimizda ekologik boshqaruv tizimi izchil takomillashtirilayotgani ta'kidlandi. Raqamli xizmatlar joriy etilmoqda, ma'muriy tartib-taomillar qisqartirilmoqda va davlat xizmatlarining shaffofligi oshirilmoqda. Xususan, davlat ekologik ekspertizasi elektron formatga o'tkazilmoqda, bu esa arizalarni ko'rib chiqish muddatlarini sezilarli darajada qisqartirish hamda inson omili ta'sirini kamaytirish imkonini beradi.

Uchrashuv davomida ekologik qonunchilikni yanada takomillashtirish, ekologik modernizatsiyani amalga oshirayotgan korxonalarni qo'llab-quvvatlash, zamonaviy tozalash inshootlari, avtomatik monitoring tizimlari va chiqindilarni qayta ishlash texnologiyalarini joriy etishni rag'batlantirish bo'yicha takliflar muhokama qilindi. Davlat xizmatlarini raqamlashtirish, ruxsat berish tartib-taomillarini soddalashtirish va davlat ekologik nazorati mexanizmlarini takomillashtirish masalalariga alohida e'tibor qaratildi.

Ochiq muloqot bevosita muloqot formatida o'tdi, bu esa tadbirkorlarga o'zlarini tashvishlantirayotgan masalalar bo'yicha to'g'ridan-to'g'ri murojaat qilish va atroflicha javoblar olish imkonini berdi. Bunday uchrashuvlar tadbirkorlikni yanada rivojlantirish hamda biznesning ekologik mas'uliyatini oshirishga qaratilgan birgalikdagi yechimlarni ishlab chiqish uchun samarali maydon bo'lib xizmat qiladi.