O'zbekistonda o'rmon yong'inlarining oldini olish bo'yicha profilaktik tadbirlar o'tkazilmoqda
2026-08-04 19:05:00 / Yangiliklar
Mazkur mashg'ulotlarda davlat qo'riqxonalari, milliy tabiat bog'lari va o'rmon xo'jaliklari xodimlari, shuningdek, Favqulodda vaziyatlar vazirligi bo'linmalari hamda tibbiyot muassasalari vakillari ishtirok etmoqda.
O'quv mashg'ulotlari davomida o'rmon yong'inlarini tezkor bartaraf etish, yong'inni o'chirishning birlamchi vositalaridan to'g'ri foydalanish, tezkor axborot almashinuvi va xizmatlararo hamkorlikni tashkil etish, shuningdek, jabrlanganlarga birinchi tibbiy yordam ko'rsatish bo'yicha amaliy harakatlar mashq qilinmoqda.
Shuningdek, maxsus yong'in o'chirish texnikalari va jihozlarining shayligi tekshirilib, favqulodda vaziyatlar yuzaga kelganda barcha jalb etilgan xizmatlarning o'zaro muvofiqlashtirilgan hamkorlik mexanizmlarini yanada takomillashtirishga alohida e'tibor qaratilmoqda.
Mashg'ulotlar yakunida ishtirokchilarning harakatlari batafsil tahlil qilinadi, aniqlangan kamchiliklarni bartaraf etish yo'nalishlari belgilanadi hamda o'rmonlar va alohida muhofaza etiladigan tabiiy hududlarda yong'in xavfsizligi darajasini yanada oshirishga qaratilgan qo'shimcha chora-tadbirlar ishlab chiqiladi.