O‘zbekiston Respublikasi Ekologiya va iqlim o‘zgarishi milliy qo‘mitasi

Ushbu tasvirlarda baland tog‘larda yashovchi bu jonivorlarning tabiat qo‘ynida erkin va bexavotir yurganligini ko‘rish mumkin. Bu esa, o‘z navbatida, mamlakatimizda noyob hayvonlarning muhofazasini ta’minlash borasida amalga oshirilayotgan ishlarning amaliy bir ko‘rinishidir.

Qor qoploni tabiiy majmualarda zaif, tabiatan kamyob, lokal tarqalgan tur hisoblanadi. Bu tur qat’iy himoyalangan: 1975-yildan beri qor qoploni yo‘qolib ketish xavfi ostida turgan yovvoyi fauna va flora turlari bilan xalqaro savdo to‘g‘risidagi konvensiyaning (CITES) I-ilovasida va 1986-yildan beri ko‘chib yuruvchi yovvoyi hayvonlar turlarini muhofaza qilish to‘g‘risidagi konvensiyaning (CMS) I -ilovasida ro‘yxatga olingan. 2017-yilda Xalqaro tabiatni muhofaza qilish ittifoqi (IUCN) uni yo‘q bo‘lib ketish xavfi ostida bo‘lgan zaif tur deb tasnifladi. O‘zbekiston Respublikasi “Qizil kitobi”ga kiritilgan.

Qor qoploni ko‘pincha tuyoqli hayvonlar, mayda qushlar va kemiruvchilar bilan oziqlanadi. Kuzatishlar natijasiga ko‘ra, qor qoploni bugungi kunda qo‘riqxonaning Gʻilon, Miraki, Tanxozdaryo, Qizilsuv bo‘limlarida uchraydi.

Sibir tog‘ echikilari odatda chiqish qiyin bo‘lgan baland tog‘larda yashaydi. “Hisor” davlat qo‘riqxonasi ham bu jonivorlarning doimiy yashash maskani hisoblanadi. Qo‘riqxona xodimlarining ma’lum qilishicha, olib borilgan izchil muhofaza chora-tadbirlari natijasida keyingi yillarda ular sonining ko‘payayotgani kuzatilmoqda.