Joriy yilning 19-mayidan 22-iyuliga qadar Ekopolitsiya
xodimlari Toshkent shahri va Toshkent viloyatida nazorat reydlarini o‘tkazdi. Reydlar davomida asosiy e’tibor qurilish chiqindilarini belgilangan joylardan tashqariga noqonuniy tashish va tashlash, shuningdek, daraxtlarni noqonuniy kesish holatlarini aniqlashga qaratildi.

Tadbirlar davomida Toshkent viloyatining Yuqori Chirchiq, Quyi Chirchiq, Zangiota va Qibray tumanlari, shuningdek, poytaxtning Yangihayot, Yunusobod va Sergeli tumanlarida ekologik qonunchilik talablarining ko‘plab buzilish holatlari aniqlandi. Fuqarolar qurilish chiqindilarini transport vositalari yordamida belgilanmagan joylarga tashlab kelgani ma’lum bo‘ldi.

Reydlar yakunlariga ko‘ra, huquqbuzarlarga nisbatan 48 ta ma’muriy bayonnoma rasmiylashtirildi. Ularga nisbatan jami 316,3 million so‘m miqdorida jarima belgilandi.

Bundan tashqari, reydlar davomida bir yil ichida chiqindilarni noqonuniy tashlash bilan bog‘liq huquqbuzarlikni takroran sodir etgan haydovchi ham aniqlandi. Mazkur holat yuzasidan hujjatlar belgilangan tartibda huquqni muhofaza qiluvchi organlarga yuborish uchun tayyorlanmoqda.

Ekologiya va iqlim o‘zgarishi milliy qo‘mitasi fuqarolarni noqonuniy ravishda chiqindilarni tashlash atrof-muhitga jiddiy zarar yetkazishi, hududlarning sanitariya-ekologik holatini yomonlashtirishi hamda O‘zbekiston Respublikasi qonunchiligida belgilangan javobgarlikka sabab bo‘lishini yana bir bor eslatadi.

Ekopolitsiya tomonidan reyd tadbirlari respublikaning barcha hududlarida davom ettirilmoqda.