O‘zbekiston Respublikasi Ekologiya va iqlim o‘zgarishi milliy qo‘mitasi

Tadbir cho‘llanishning oldini olish, degradatsiyaga uchragan yerlarni tiklash hamda tabiiy resurslarni barqaror boshqarish sohasida xalqaro hamkorlikni rivojlantirish bo‘yicha ilg‘or tajriba almashish uchun muhim maydonga aylandi.
Unda Prezidentning ekologiya masalalari bo‘yicha maslahatchisi — Ekologiya va iqlim o‘zgarishi milliy qo‘mitasi raisi Aziz Abduhakimov, O‘rmon agentligi direktori Erkin Muhiddinov, Xitoy Xalq Respublikasi Ichki Mo‘g‘uliston avtonom rayoni partiya qo‘mitasi kotibi o‘rinbosari Shi Guanhui, tegishli vazirlik va idoralar, ilmiy doiralar, xalqaro tashkilotlar hamda ommaviy axborot vositalari vakillari ishtirok etdi.

Tadbir davomida ekologik barqarorlikni ta’minlash, cho‘llanish jarayonlarining oldini olish, o‘rmonlar maydonini kengaytirish, degradatsiyaga uchragan hududlarni tiklash va qo‘shma tabiatni muhofaza qilish loyihalarini amalga oshirish masalalari muhokama qilindi. Shuningdek, o‘rmon va yaylov xo‘jaligi sohasiga innovatsion texnologiyalar hamda ilmiy ishlanmalarni joriy etishga alohida e’tibor qaratildi.

Tadbirning muhim voqealaridan biri Xitoyning Ichki Mo‘g‘ulistonda cho‘llanishga qarshi kurash borasida erishgan yutuqlariga bag‘ishlangan ko‘rgazma bo‘ldi. Mehmonlarga ekologik himoya to‘sig‘ini barpo etish va degradatsiyaga uchragan ekotizimlarni tiklash bo‘yicha amalga oshirilgan keng ko‘lamli davlat dasturi natijalari namoyish etildi.

Ishtirokchilar, shuningdek, Xitoyning “Uch shimoliy himoya o‘rmon mintaqalari” milliy loyihasi amalga oshirilishiga bag‘ishlangan “Yashil Ipak yo‘li: sahroning yangi hayoti” nomli hujjatli film bilan tanishdilar. Filmda mamlakatning qurg‘oqchil hududlarni ko‘kalamzorlashtirish, yerlarni tiklash va cho‘llanishga qarshi samarali tizim yaratish borasidagi ko‘p yillik tajribasi yoritildi.

Amaliy dastur doirasida Ichki Mo‘g‘uliston avtonom rayoni va O‘zbekiston Respublikasi mutaxassislari o‘rtasida o‘rmon va yaylov xo‘jaligi sohasida tajriba almashinuvi tashkil etildi. Mavzuli taqdimotlar davomida Ichki Mo‘g‘uliston avtonom rayoni O‘rmon va yaylov xo‘jaligi boshqarmasi boshlig‘i Van Chjaoshen tabiiy ekotizimlarni tiklash, ko‘chat yetishtirishning zamonaviy texnologiyalarini qo‘llash hamda o‘rmon resurslarini boshqarish bo‘yicha Xitoy tajribasini taqdim etdi. "Green University" rektori Baxtiyor Po‘latov esa ilmiy-ta’limiy hamkorlikni rivojlantirish, ekologiya yo‘nalishida mutaxassislar tayyorlash va qo‘shma ilmiy-tadqiqot loyihalarini amalga oshirish istiqbollari haqida so‘z yuritdi.

Yakunida "M-Grass Ecology and Environment Group Co., Ltd." korporatsiyasi hamda "Green University" o‘rtasida hamkorlik to‘g‘risidagi bitim imzolandi. Mazkur hujjat urug‘ va ko‘chat yetishtirish, degradatsiyaga uchragan yaylovlarni tiklash, yerlarning cho‘llanishiga qarshi kurashish, shuningdek, ekologiya sohasiga zamonaviy texnologiyalarni joriy etish bo‘yicha qo‘shma loyihalarni amalga oshirishni nazarda tutadi.

Erishilgan kelishuvlar ekologiya va tabiiy resurslardan barqaror foydalanish sohasida O‘zbekiston–Xitoy hamkorligini yanada mustahkamlash yo‘lidagi navbatdagi muhim qadam bo‘ldi. Ular O‘rmon agentligi delegatsiyasi tomonidan Inchuan shahrida “Xitoy va Markaziy Osiyoning cho‘llanishga qarshi kurashdagi hamkorligi” xalqaro konferensiyasi doirasida imzolangan avvalgi bitimlarni mantiqan davom ettirib, tabiiy ekotizimlarni asrash, hududlarning o‘rmon bilan qoplanish darajasini oshirish hamda iqlim o‘zgarishiga qarshi kurashishga qaratilgan yangi qo‘shma loyihalarni amalga oshirish uchun keng imkoniyatlar yaratadi.