Xususan, Samarqand viloyatidagi Zarafshon milliy tabiat bog‘ida yong‘in xavfi yuqori bo‘lgan hududlarda nazorat va patrullik ishlari kuchaytirildi, yovvoyi hayvonlar hamda Qizil kitobga kiritilgan, yo‘qolib ketish xavfi ostidagi hayvon turlari uchun sun'iy suv ichish joylari muntazam suv bilan ta'minlanmoqda. Shuningdek, volyerlarda parvarishlanayotgan Buxoro bug‘ulari uchun sun'iy suv havzalari suv bilan to‘ldirilib, doimiy nazoratga olindi, hududning muhim nuqtalariga 1 tonnalik suv sig‘imlari joylashtirildi va yong‘inga qarshi texnika hamda jihozlar doimiy shay holatga keltirildi.

Qolaversa, Navoiy viloyatida joylashgan "Markaziy Qizilqum" milliy tabiat bog'i hududida yovvoyi hayvonlar va qushlarning suvga bo'lgan ehtiyojini qondirish maqsadida mavjud tabiiy va sun'iy suv manbalarining holati doimiy nazoratga olindi. Bog' xodimlari tomonidan hududdagi suv ichish joylari ko'zdan kechirilib, suv zaxiralari to'ldirilmoqda hamda zarur bo'lgan uchastkalarda qo'shimcha suv manbalari tashkil etilmoqda.

Bundan tashqari, Qoraqalpogʻiston Respublikasidagi “Sudoche-Akpetki” va "Barsakelmes" davlat buyurtma qoʻriqxonalari, Navoiy viloyatidagi "Oqtog'-Tomdi" davlat qo'riqxonasi, Jizzax viloyatidagi Zomin davlat qo‘riqxonasi, Surxondaryo viloyatidagi Surxon davlat qo‘riqxonasi, Xorazm va Buxoro viloyatlari hududida joylashgan Qizilqum davlat qo‘riqxonasi va boshqa muhofaza hududlarida anomal issiqda yong‘in xavfsizligiga qat'iy amal qilishga qaratilgan seminar va o‘quv mashg‘ulotlari o‘tkazilib, xodimlarga kerakli tavsiyalar berilmoqda.