O‘zbekiston Respublikasi Ekologiya va iqlim o‘zgarishi milliy qo‘mitasi

Bu kunlarda o‘z salomatligingiz hamda yaqinlaringiz xavfsizligiga alohida e’tibor qaratish muhim. Imkon qadar kunning eng issiq vaqtlarida ochiq quyosh ostida bo‘lmaslik, yetarli miqdorda suyuqlik iste’mol qilish va zarur ehtiyot choralariga rioya etish tavsiya etiladi.

Anomal issiq nafaqat insonlar, balki atrof-muhit uchun ham jiddiy xavf tug‘diradi. Yuqori harorat daraxt va butalarning qurib qolishiga, yashil hududlar holatining yomonlashishiga, yosh ko‘chatlarning nobud bo‘lishiga hamda hayvonot olamiga salbiy ta’sir ko‘rsatishi mumkin.
 

Ekologiya va iqlim o‘zgarishi milliy qo‘mitasi yurtdoshlarimizni, mutasaddi tashkilotlarni hamda barcha mas’ul tuzilmalarni o‘simlik va hayvonot dunyosini asrashga alohida e’tibor qaratishga chaqiradi. Ayniqsa, “Yashil makon” umummilliy loyihasi doirasida ekilgan yosh ko‘chatlar ekstremal issiq ta’siriga eng ko‘p uchraydi va qo‘shimcha parvarish hamda o‘z vaqtida sug‘orishga muhtoj.

Mahalliy davlat hokimiyati organlari, kommunal xizmatlar, korxona va tashkilotlarga ko‘chalar hamda jamoat joylarini sovitish ishlarini davom ettirish, yashil hududlarni sug‘orishni kuchaytirish, sug‘orish tizimlarining uzluksiz ishlashini ta’minlash, yaqinda ekilgan daraxtlarni alohida nazoratga olish, shuningdek, tabiiy yong‘inlarning oldini olish va tabiiy resurslarni asrash bo‘yicha qo‘shimcha choralarni ko‘rish tavsiya etiladi.

Bugun saqlab qolingan har bir daraxt, sug‘orilgan har bir ko‘chat va o‘z vaqtida ko‘rilgan har bir chora mamlakatimizning ekologik xavfsizligi hamda barqaror kelajagiga qo‘shilgan munosib hissadir.

O‘zingizni, yaqinlaringizni va tabiatni asrang!