O‘zbekiston Respublikasi Ekologiya va iqlim o‘zgarishi milliy qo‘mitasi

Ekologiya qo‘mitasi raisi o‘rinbosari J.Kazbekov, Hisob palatasi mas'ul xodimlari B.Dushayev, B.Zufarov va Adliya vazirligi mas'ul xodimi I.Abdullayev, Qo‘mita xodimlari ishtirok etgan seminarda O‘zbekiston Respublikasi Prezidentining 2025-yil 25-iyuldagi “Davlat organlari va tashkilotlarida ijro intizomini yanada mustahkamlashning qo‘shimcha chora-tadbirlari to‘g‘risida”gi PF–117-son Farmonida belgilangan vazifalar bugungi kunda ijro intizomini mustahkamlashda muhim ahamiyat kasb etayotgani ta’kidlandi.

Seminarda Hisob palatasi va Adliya vazirligi mas’ullari tomonidan qonunchilik hujjatlari ijrosini tashkil etishda amalda bo‘lgan normativ-huquqiy hujjatlar, jumladan, davlat organlari va tashkilotlarida ijro intizomini yanada mustahkamlashga qaratilgan Prezident farmonlari va qarorlari mazmun-mohiyati yuzasidan tushuntirishlar berildi. Shuningdek, Qo‘mita markaziy apparati hamda tizim tashkilotlarida 2026-yil birinchi yarim yilligi davomida qonunchilik hujjatlarida belgilangan topshiriqlar ijrosi natijalari tahlil qilinib, ishtirokchilarga “Ijro.gov.uz” tizimida topshiriqlarni o‘z vaqtida va sifatli bajarish, ijro natijalarini yetarlicha asoslangan ma’lumotlar bilan rasmiylashtirish, ijroni nazorat qilish hamda amaliyotda uchrayotgan muammolarning oldini olish bo‘yicha amaliy tavsiyalar berildi.

Seminarda bajarilmaslik xavfi hamda ijro muddati kelayotgan topshiriqlarning o‘z vaqtida bajarilishini ta’minlashda Hisob palatasi va Adliya vazirligi mas’ullari bilan muntazam ravishda “jonli muloqot” olib borish zarurligi ta’kidlandi.

Tadbir yakunida 2026-yilning ikkinchi yarim yilligida ijrosi belgilangan barcha topshiriqlarni o‘z vaqtida, sifatli va to‘liq bajarish, ijro intizomi bo‘yicha kundalik nazoratni kuchaytirish, rahbarlarni muntazam xabardor qilib borish hamda mas’ul tarkibiy bo‘linmalar o‘rtasida doimiy hamkorlikni yo‘lga qo‘yish bo‘yicha aniq vazifalar belgilandi.