O‘zbekiston Respublikasi Ekologiya va iqlim o‘zgarishi milliy qo‘mitasi

Tashrif davomida Tarifa Alzaabi ICBA bilan hamkorlikda barqaror qishloq xo‘jaligini rivojlantirishga qaratilgan xalqaro loyiha doirasida amalga oshirilayotgan ishlar bilan yaqindan tanishdi. Shuningdek, mavjud muammolar hamda loyihani amalga oshirishda kerakli bo‘lgan laboratoriya jihozlari bilan ta’minlash bo‘yicha takliflar berildi.

Bundan tashqari, hududda yangi zamonaviy issiqxona qurish, olimlar malakasini oshirish va boshqa masalalar muhokama qilindi. 

Ma'lumot uchun, Orolbo‘yi innovatsiya markazi tomonidan bugungi kunga kelib ilmiy tadqiqotlar olib borish va loyihalarni amalga oshirish bo‘yicha bir qator xalqaro, mahalliy tashkilotlar va ilmiy-tadqiqot institutlari bilan doʻstona sheriklik aloqalari oʻrnatildi. 50 dan ortiq xorijiy va mahalliy tashkilotlar bilan oʻzaro hamkorlik toʻgʻrisida kelishuvlar va memorandumlar imzolandi.

Xususan, ICBA xalqaro markazi loyihasi doirasida turli mamlakatlardan keltirilgan kinoa oʻsimligining 5  namunasi, 1 ta amarant oʻsimligi namunasi, bufel oʻti, koʻk tariq, 10 ta donli joʻxori namunalarini sinovdan oʻtkazish, mahalliy yovvoyi oʻsimliklar florasi (tuya tikan, shirin qizilmiya) vakillarini madaniylashtirish boʻyicha tadqiqotlar olib borildi. 

Qolaversa, Orol dengizi mintaqasiga moslashgan oʻsimliklarning sanoat plantatsiyalarini yaratishda foydalanish uchun Tottori universiteti (Yaponiya) bilan hamkorlikda yogʻochli daraxtlarning tez oʻsadigan, jumladan, jiyda, aylant, Kanada toli va pavloniya kabi turlarini tanlab olish boʻyicha tadqiqotlar olib borilmoqda. Bahorgi bugʻdoy, joʻxori, makkajoʻxori, aspir, moyli zigʻir, Afrika tarigʻi, beda, soya, mosh va boshqa oʻsimliklarning turli xil namunalarida ekologik sinovlar oʻtkazildi. 

ICBA xalqaro markazi (BAA) moliyaviy koʻmagida Orol dengizining qurigan tubidan 10 xildan ortiq tuproq tiplarini bir joyga toʻplash  va ilmiy tadqiqotlar olib borish maqsadida lizimetrik tadqiqot maydonchasi barpo etildi va tuproqlar olib kelinib, tadqiqot ishlari amalga oshirildi.