Yig‘ilish davomida Davlat ekologik ekspertizasi markazi direktori G‘ayrat Muhamedov muassasa faoliyati hamda ekologik ekspertiza tizimini takomillashtirish bo‘yicha amalga oshirilayotgan chora-tadbirlar haqida batafsil ma’lumot berdi. Ta’kidlanishicha, 2025–2026-yillarda Markaz tomonidan 69,8 mingdan ortiq ekologik xulosa berilgan. Faqatgina 2026-yilning birinchi yarmida 20 mingdan ziyod loyiha ko‘rib chiqilib, ularning 88,5 foizi ijobiy xulosa olgan.

Yig‘ilishda zamonaviy raqamli yechimlarni joriy etishga alohida e’tibor qaratildi. Bugungi kunda eco-service.uz portali ekologik ekspertiza jarayonlarini to‘liq elektron shaklga o‘tkazib, ariza beruvchilarga murojaat topshirishdan tortib yakuniy xulosani olishgacha bo‘lgan barcha bosqichlarni onlayn kuzatish imkonini bermoqda. Shuningdek, Markaz tomonidan atrof-muhitga ta’sirni baholash jarayonlariga sun’iy intellekt elementlarini joriy etish, xalqaro hamkorlikni kengaytirish hamda O‘zbekistonda Orxus markazini tashkil etish bo‘yicha ishlar olib borilmoqda.

Bundan tashqari, ekologik jarayonlarda jamoatchilik ishtirokini ta’minlash borasidagi natijalar ham taqdim etildi. Xususan, 2025–2026-yillarda 2,7 mingdan ortiq jamoatchilik eshituvlari o‘tkazilib, ularda qariyb 29 ming nafar fuqaro ishtirok etdi. Aholi va fuqarolik jamiyati institutlari bilan faol hamkorlik natijasida qator loyihalar qayta ishlash uchun qaytarilgan yoki ularga kelishuv berilmagan.

"Green University" faoliyati to‘g‘risida ilmiy ishlar bo‘yicha prorektor Saidjahon Hasanov ma’ruza qildi. U uch yil davomida universitet ekologik ta’lim, ilmiy tadqiqotlar va kadrlar tayyorlashni birlashtirgan yagona davlat platformasiga aylanganini ta’kidladi. Hozirgi vaqtda oliy ta’lim muassasasida 292 nafar talaba tahsil olmoqda, 4 ta bakalavriat va 7 ta magistratura ta’lim dasturi amalga oshirilmoqda. Universitetning xalqaro hamkorlik tarmog‘i esa 70 dan ortiq xorijiy hamkorni qamrab oladi.

Ta’kidlanganidek, universitet ilmiy-tadqiqot faoliyatini ham izchil rivojlantirmoqda. So‘nggi uch yil davomida 511 ta ilmiy ish chop etilgan, umumiy qiymati 3,6 million yevrodan ortiq xalqaro grant loyihalari amalga oshirilmoqda. Shuningdek, 20 dan ortiq ilmiy laboratoriya faoliyat yuritib, iqlim o‘zgarishi, bioxilma-xillik, suv resurslari va yashil iqtisodiyot yo‘nalishlarida ilmiy loyihalar olib borilmoqda.

2030-yilgacha mo‘ljallangan rivojlanish strategiyasiga muvofiq, "Green University" Markaziy Osiyoning yetakchi ekologik universitetiga aylanish, QS, THE va "GreenMetric" xalqaro reytinglariga kirish, ta’lim dasturlarini kengaytirish hamda mintaqaviy ilmiy-ta’lim markazi sifatidagi mavqeini mustahkamlashni o‘z oldiga maqsad qilib qo‘ygan.

Yig‘ilish davomida Jamoatchilik kengashi a’zolari Orxus markazini tashkil etish, ekologik ekspertiza mexanizmlarini takomillashtirish, ekologik ahamiyatga ega qarorlarni qabul qilish jarayonlarida jamoatchilik ishtirokini kengaytirish, yoshlar tashabbuslarini qo‘llab-quvvatlash hamda aholining ekologik madaniyatini yuksaltirish masalalarini ham muhokama qildilar.

Yakunda Jamoatchilik kengashi a’zolari Davlat ekologik ekspertizasi markazi va "Green University" faoliyatiga yuqori baho berib, ularning mamlakat ekologik siyosatini rivojlantirish, faoliyatning ochiqligini ta’minlash hamda jamoatchilik bilan samarali hamkorlikni yo‘lga qo‘yishdagi salmoqli hissasini alohida e’tirof etdilar.