Marosimda o‘qib eshittirilgan Ekologiya vaziri Aziz Abduhakimovning tabrik maktubida ekologiya, atrof-muhitni muhofaza qilish, ichki va tashqi turizmni rivojlantirishga oid yangi g‘oya va loyihalar yaratish, bu boradagi muammolarga samarali yechim izlashda yoshlarning faolligi oshgani ta’kidlandi. 

"Festival ishtirokchilarining tashabbuslari va yangi g‘oyalari bizni juda xursand qildi. Yoshlarning bioxilma-xillikni saqlash, chiqindilardan kelib chiqadigan ekologik zararni kamaytirish, daraxt ekish texnologiyalarini rivojlantirish, ekologik bilim va madaniyatni oshirish, turizm uchun yanada qulayliklar yaratishga qaratilgan loyihalari bizda katta taassurot qoldirdi", – dedi vazir.

Ekologiya, atrof-muhitni muhofaza qilish va iqlim o‘zgarishi vazirligi, Turizm qo‘mitasi, Qashqadaryo viloyati hokimligi hamkorligida o‘tkazilgan qurultoyda mahalliy va xorij davlatlaridan kelgan 1000 dan ortiq yoshlar ishtirok etdi. Ishtirokchilar turli tanlovlarda bellashib, o‘z iqtidorlarini namoyish etishdi.

Xususan, “Biz bir jamoamiz — salom, qurultoy!” tanishtiruv musobaqasida Qirg‘iz Respublikasidan kelgan yoshlar hamda Farg‘ona viloyati jamoalari 1-o‘rinni, Qoraqalpog‘iston Respublikasi 2-o‘rinni, Namangan viloyati jamoasi esa 3-o‘rinni egalladi.

Shuningdek, “Eng yaxshi ekologik loyiha” tanlovi g‘oliblari ham ma’lum bo‘ldi. Andijonlik Abdulhamid Haydarov cho‘llanishni to‘xtatish, o‘simlik dunyosi uchun sharoit yaratish, suvni tejash va chiqindilardan qutulish kabi maqsadlarni qamrab olgan “Adesert” loyihasi bilan birinchi o‘rinni egalladi. Toshkent shahridan Feruzbek Saydullayev esa batareykalarni to‘g‘ri qayta ishlash va batareyka chiqindilarining ekotizimlarga zararini kamaytirishga qaratilgan “Batareyka.uz” loyihasi bilan ikkinchi o‘rinni oldi. Xorazm viloyatidan Surayyo Sobirova Xorazm iqlimiga to‘g‘ri keladigan ko‘chatlar o‘tqazish, xususan, gujum va qayrag‘och daraxtini chatishtirib ekish g‘oyasi ilgari surilgan “Gujum” loyihasi bilan uchinchi o‘rinni egalladi.

Bundan tashqari, atrof-muhitni chiqindilardan tozalashga qaratilgan “Chiqindisiz dunyo uchun” plogging musobaqalari ham o‘tkazildi. Unda 107,4 kg chiqindi to‘plagan Buxoro viloyati jamoasi 1-o‘ringa, 57,8 kg chiqindi to‘plagan Surxondaryo viloyati 2-o‘ringa, 56,1 kg chiqindi to‘plagan Toshkent viloyati esa 3-o‘ringa munosib ko’rildi. Plogging davomida jami 533 kg chiqindi yig‘ildi. 

Qolgan tanlovlarda yakuniy natijalar quyidagicha:

“Siz eko-qonunlarni bilasizmi?” tanlovi: 
1-o‘rin — Toshkent shahri; 
2-o‘rin — Farg‘ona viloyati; 
3-o‘rin — Qashqadaryo viloyati

Sport musobaqalari:
1-o‘rin — Surxondaryo viloyati
2-o‘rin — Qashqadaryo viloyati
3-o‘rin — Sirdaryo viloyati

“Eng yaxshi turizm loyihasi”:
1-o‘rin — Nigora Orifjonova (Sirdaryo viloyati)
2-o’rin — Zilola Hakimjonova (Toshkent viloyati)
3-o‘rin — Dolotyor Dourotxonov (Qoraqalpog‘iston Respublikasi)

Xorijliklar o‘rtasida “Zakovat” intellektual o‘yini:
1-o‘rin — “Ipak yo‘li” turizm va madaniy meros xalqaro universiteti
2-o‘rin — Tojikiston Respublikasi
3-o‘rin — Qirg‘iz Respublikasi.

Ta’kidlash joizki, har yili o‘tkazib kelinayotgan xalqaro festival mamlakatimiz va xorij yoshlarini ekologiya va turizm sohasida o‘zaro fikr hamda tajriba almashish uchun birlashtiradigan muhim voqeaga aylandi. Ishtirokchilar atrof-muhitni asrash va turizmni rivojlantirishga qaratilgan yuksak bilim, ijodkorlik va ishtiyoqni namoyish etishdi. Festival nafaqat raqobat qilinadigan, balki yanada barqaror va ekologik toza kelajakni barpo etishga qaratilgan yangi g‘oyalar va loyihalar topiladigan maydonga aylandi.