O‘zbekiston Respublikasi Ekologiya va iqlim o‘zgarishi milliy qo‘mitasi

Marosimda nutq so‘zlagan Ekologiya vaziri simpozium nega aynan “Haykaltaroshlik, atrof-muhit va iqlim oʻzgarishi” mavzusiga bagʻishlanganini aytib o‘tdi.

 “Barchangizga maʼlumki, bugungi kunda ekologik muammolar insoniyat uchun global tahdidlarga aylandi. Ona sayyoramizda atrof-muhitning ifloslanishi, iqlim o‘zgarishi muammolariga duch kelmagan biror-bir mintaqa yoki davlat qolmadi hisob. Istalgan hududni oling, ekologik muvozanat izdan chiqishi, havo ifloslanishi, chiqindilarni boshqarish, qoʻyingki, inson omili bilan tabiatga yetkazilayotgan zararlarning oldini olish dolzarb boʻlib turibdi. Simpoziumdan maqsad jamoatchilik e’tiborini yuqoridagi kabi muammolarga qaratishdir”, – dedi vazir.

Tadbirda simpozium nafaqat madaniy merosni rivojlantirishga, balki atrof-muhitni muhofaza qilish muammolaridan xabardorlikni oshirishga ham xizmat qilishi taʼkidlandi. Tabiiy materiallardan foydalanish va sanʼatning atrof-muhit bilan oʻzaro taʼsiriga eʼtibor ijodkorlik va tabiat oʻrtasidagi uygʻunlik zarurligini taʼkidlaydi.

Tadbir davomida simpoziumga bag‘ishlangan rolik namoyish qilindi. Shuningdek, bunday tadbirlar haykaltaroshlik yoʻnalishida malakali kadrlar tayyorlashga zamin yaratishi, mahalliy va xorijlik haykaltaroshlar oʻrtasida oʻzaro tajriba almashish imkonini berishi, yurtimizda haykaltaroshlikning yanada rivojlanishiga hissa qoʻshishi qayd etildi. 

Ma’lumot uchun, haykaltaroshlik simpoziumida Eron, Turkiya, Bolgariya, Ispaniya, Rossiya, Estoniya, Ukraina, Xitoy, BAA, Belarus, Hindiston, Ozarbayjon, Gruziya kabi davlatlardan kelgan 20 nafar va 6 nafar mahalliy haykaltaroshlar “Haykaltaroshlik, atrof-muhit va iqlim oʻzgarishi” mavzusida haykallar yasashadi. Shuningdek, yosh ijodkorlar uchun mahorat darslari, amalish mashgʻulotlar tashkil etiladi, “ustoz-shogird” anʼanalari namoyish qilinadi. Bundan tashqari, simpozium ishtirokchilari uchun Toshkent shahri, Buxoro va Toshkent viloyatlaridagi muzeylar hamda madaniy meros obyektlariga sayohatlar uyushtiriladi.

Simpozium davomida yaratilgan betakror badiiy yechimga, gʻoyaga ega boʻlgan, yuksak estetik talab darajasidagi haykallar Toshkent shahrining madaniy muhiti va badiiy qiyofasini shakllantirish maqsadida istirohat bogʻlari, dam olish zonalari, koʻngilochar va sayyohlik maskanlariga, shu bilan birga, Markaziy Osiyo atrof-muhit va iqlim oʻzgarishini oʻrganish universiteti ("Green University")ga  oʻrnatiladi.

Simpozium yakunida ishtirokchilarga sertifikatlar va gonorarlar topshiriladi.