O‘zbekiston Respublikasi Ekologiya va iqlim o‘zgarishi milliy qo‘mitasi

Qarorga muvofiq, 2026-yil 1-avgustdan 2028-yil 1-yanvargacha respublika hududida soni kamayib borayotgan yoki yo‘qolib ketish xavfi ostida bo‘lgan yovvoyi hayvonlarning 66 turini ovlash taqiqlanadi. Cheklovlar qushlar, sutemizuvchilar, baliqlar, sudralib yuruvchilar va umurtqasiz hayvonlarning turli vakillariga tatbiq etiladi. Ro‘yxatga, jumladan, qor qoploni, Turkiston silovsini, Buxoro bug‘usi, sayg‘oq, tuvaloq, flamingo va boshqa noyob turlar kiritilgan.

Bunda taqiq ixtisoslashtirilgan fermer xo‘jaliklari, pitomniklar, inkubatorlar va baliqchilik xo‘jaliklarida saqlanayotgan hamda ko‘paytirilayotgan hayvonlarga, shuningdek, ularni ilmiy va tibbiy maqsadlarda foydalanish holatlariga tatbiq etilmaydi. Bundan tashqari, cheklovlar amal qiladigan davrda mazkur ro‘yxatga kiritilgan hayvon turlarini ovlash uchun kvotalar ajratilishiga ham yo‘l qo‘yilmaydi.

Hujjatda ovchilarni tayyorlash tizimini takomillashtirish ham nazarda tutilgan. 2026-yil 1-avgustdan boshlab fuqarolarni ovchilik ishiga o‘qitish faqat ixtisoslashtirilgan o‘quv poligonlarida, instruktorlar rahbarligida hamda ro‘yxatdan o‘tkazilgan ov yoki sport qurollaridan foydalangan holda amalga oshiriladi.

Qarorda ixtiofaunani tiklash masalasiga ham alohida e’tibor qaratilgan. Joriy yilning 1-avgustiga qadar Ekologiya va iqlim o‘zgarishi milliy qo‘mitasi Fanlar akademiyasi hamda Baliqchilik ilmiy-tadqiqot instituti bilan hamkorlikda daryo va soylarni ularning ekotizimi holatini inobatga olgan holda baliqlashtirish uchun tavsiya etiladigan baliq turlari ro‘yxatini tasdiqlaydi.

2026–2030-yillar davomida har yili respublikaning markaziy shaharlaridan oqib o‘tuvchi daryo va soylarga kamida 15 tonna baliq qo‘yib yuborilishi rejalashtirilgan. Chavoqlantirish ishlari Amudaryo, Sirdaryo, Sangzor, Qoradaryo, Qashqadaryo, Tanxozdaryo, Surxondaryo, shuningdek, Farg‘ona va Namangan viloyatlaridagi ayrim shahar soylarida amalga oshiriladi.

Qarorda noqonuniy ov va brakonyerlikning oldini olish ustidan nazoratni kuchaytirish, aholi o‘rtasida keng ko‘lamli axborot-tushuntirish ishlarini olib borish hamda idoraviy normativ-huquqiy hujjatlarni yangi talablarga muvofiqlashtirish ham nazarda tutilgan.

Qabul qilingan chora-tadbirlar bioxilma-xillikni saqlash, tabiiy ekotizimlarning barqarorligini ta’minlash hamda «O‘zbekiston – 2030» strategiyasida belgilangan vazifalarni amalga oshirish yo‘lidagi muhim qadam bo‘ladi.