Ekologiya, atrof-muhitni muhofaza qilish va iqlim o‘zgarishi vazirligi va Bosh prokuratura huzuridagi eko prokuratura boshqarmasi tomonidan tashkil etilgan tanlovda qurultoy ishtirokchilaridan shakllantirilgan jamoalar o’z hududlari nomidan ishtirok etdi.

Tanlov “Bu bizning hudud”,  “Intellektual ring” va “Ekologiya uchun barchamiz mas’ulmiz!” shartlari asosida o’tkazildi. Ishtirokchilar I shartda o‘z hududlarining ekologik holati, ekomadaniyati, hudud ekologiyasini yaxshilash uchun qilinayotgan ishlar, yoshlarning ekologiyaga bo‘lgan munosabatini ochib berishdi. Ikkinchi shartda esa jamoalar belgilangan vaqt davomida ekologik, ijtimoiy, siyosiy va huquqiy savollarga javob berishdi. Uchinchi shartda Respublikamiz ekologiyasini asrab-avaylashga qaratilgan, yoshlar orasida ekomadaniyatni targ’ib qilishni ko‘zda tutgan, plogging loyihasi mazmun-mohiyatini ochib beradigan ibratli sahna ko’rinishlari taqdim qilindi.

Tanlovni o’tkazishdan maqsad jamiyatda yoshlarning ekologiyaga oid huquqiy ongi va madaniyatini yuksaltirib borish, qonun ustuvorligini ta’minlash va qonuniylikni mustahkamlash, shuningdek, yoshlarni O‘zbekiston Respublikasi Konstitutsiyasi va boshqa qonun hujjatlariga hurmat ruhida tarbiyalash, milliy huquq tizimiga hurmat munosabatini shakllantirish, yoshlarning huquqiy tarbiyasiga salbiy ta’sir ko‘rsatuvchi omillariga nisbatan huquqiy immunitetni shakllantirish, qonun buzilishi holatlariga murosasizlik hissini uyg‘otishdir. 

Shuningdek, “Siz eko-qonunlarni bilasizmi?” ko‘rik-tanlovi yoshlarning ekologiyaga oid huquqiy savodxonligini oshirish, ekologik-huquqiy-demokratik jamiyat barpo etishda yoshlarning rolini mustahkamlashga xizmat qiladi.

Tanlov g’oliblari qurultoy yakunida e’lon qilinadi va munosib taqdirlanadi. Qurultoy 13-avgustgacha davom etadi.