Simpozium Ekologiya va iqlim o‘zgarishi milliy qo‘mitasi, Toshkent metallurgiya zavodi, Toshkent viloyati hokimligi, Badiiy akademiya va Rassomlar uyushmasi tomonidan tashkil etildi. Unda Xitoy, Fransiya, Italiya, Turkiya va Gruziyadan tashrif buyurgan hamda O‘zbekistonlik jami 18 nafar haykaltarosh ishtirok etdi. 

Haykaltaroshlar 24 kun davomida “Tosh, metal va atrof-muhit” mavzusiga bag‘ishlangan, bugungi ekologik muammolarni o‘zida aks ettirgan dolzarb asarlar yaratishdi. Asarlarda tabiiy resurslarni asrash, atrof-muhitni muhofaza qilish uchun kuchlarni birlashtirish, tabiatga shafqatsiz munosabatda bo‘lish salbiy oqibatlarga olib kelishi va boshqa shu kabi dolzarb g‘oyalar ilgari surildi.

Loyihada an’anaviy material — Samarqand viloyatining Zarband karyeri marmaridan tashqari, ilk bor Toshkent metallurgiya zavodi tomonidan taqdim etilgan metall ham ijodiy jarayonda qo‘llanildi. Shuningdek, simpozium davomida xalqaro seminarlar va ta’lim dasturlari ham tashkil etildi. Unda xorijlik haykaltaroshlar o‘z ijodiy tajribalari bilan o‘rtoqlashishdi, mualliflik uslublari va jahon haykaltaroshlik san’atining zamonaviy yo‘nalishlari haqida ma’lumot berishdi. Natijada xalqaro simpozium ilk bor ishtirok etayotgan yosh haykaltaroshlar uchun haqiqiy ijod maktabi vazifasini bajardi.

Bundan tashqari, dam olish kunlari haykaltaroshlar uchun Toshkent va Samarqand shaharlariga sayohatlar tashkil etilib, ular mamlakatimizning boy tarixi, madaniy merosi, milliy an’analari va Yangi O‘zbekistonning zamonaviy yutuqlari bilan yaqindan tanishdilar.

Simpozium yakunida haykaltaroshlar ekologik muammolar o‘ziga xos tarzda aks ettirilgan betakror asarlari uchun munosib taqdirlandi.

“Тoshkent–2026” V Xalqaro haykaltaroshlik simpoziumi yangi g‘oyalar, yangi ijodiy uchrashuvlar va yangi xalqaro loyihalar sari qo‘yilgan yana bir muhim qadamga aylandi.