O‘zbekiston Respublikasi Ekologiya va iqlim o‘zgarishi milliy qo‘mitasi

Farmonga ko‘ra, aksiya o‘tkaziladigan kunlarda davlat tashkilotlari va idoralari xodimlariga xizmat avtotransportidan foydalanish taqiqlanadi. Shu bilan birga, ushbu sanalar ish kunlariga to‘g‘ri kelgan taqdirda ham haydovchilarning ish haqi saqlab qolinadi.

Mazkur tashabbus avtotransport vositalaridan chiqadigan zararli gazlar miqdorini kamaytirish orqali aholi salomatligini muhofaza qilish, sog‘lom turmush tarzini targ‘ib etish, atmosferaga chiqarilayotgan ifloslantiruvchi moddalar hajmini qisqartirish, ekologik barqaror muhitni shakllantirish, shuningdek, jamoat transporti va ekologik toza transport vositalaridan foydalanish madaniyatini keng targ‘ib qilishga qaratilgan.

Aksiyani yuqori saviyada tashkil etish va muvofiqlashtirish maqsadida Maxsus komissiyaning tegishli bayoni qabul qilingan. Unga ko‘ra, “Avtomobilsiz kun” va “Avtomobilsiz hafta” aksiyalari doirasida davlat fuqarolik xizmatchilarining xizmat avtotransportidan foydalanishi odob-axloq va xizmat xulqi qoidalarini buzish bilan tenglashtiriladi.

Belgilangan talablarga rioya qilmaslik tegishli davlat organlari va tashkilotlari rahbarlari tomonidan davlat fuqarolik xizmatchilarini intizomiy javobgarlikka tortish uchun asos bo‘ladi.

Ma’lumot uchun, O‘zbekiston Respublikasi Prezidentining 2025-yil 25-noyabrdagi 229-sonli “Toshkent shahridagi ekologik vaziyatni yaxshilash bo‘yicha kechiktirib bo‘lmaydigan chora-tadbirlar to‘g‘risida”gi Farmoniga muvofiq, Maxsus komissiyaga transport vositalari harakatini cheklash vakolati berilgan. Maxsus komissiya tomonidan qabul qilinadigan qaror va ko‘rsatmalar barcha davlat organlari va tashkilotlari, shuningdek yuridik va jismoniy shaxslar uchun majburiy hisoblanadi.

“Avtomobilsiz kun” aksiyasi doirasida vazirlik va idoralar, mahalliy davlat hokimiyati organlari, ta’lim muassasalari hamda keng jamoatchilikning faol ishtiroki muhim ahamiyat kasb etadi. Bundan tashqari, ushbu kunlarda aholining ekologik madaniyatini oshirishga qaratilgan targ‘ibot tadbirlari, ommaviy sayrlar va jamoatchilik aksiyalari ham tashkil etiladi.

Barcha davlat tashkilotlari xodimlari va fuqarolar ushbu tashabbusni qo‘llab-quvvatlashga hamda unda faol ishtirok etib, atrof-muhit tozaligini ta’minlash va yurtimizda sog‘lom ekologik muhitni shakllantirishga munosib hissa qo‘shishga chaqiriladi.