O‘zbekiston Respublikasi Ekologiya va iqlim o‘zgarishi milliy qo‘mitasi

Muloqotda 37 dan ortiq davlat vakillari, jumladan, xorijiy mamlakatlarning tegishli vazirlik va idoralari rahbarlari, BMT tizimi vakillari, xalqaro ekspertlar, ilmiy hamjamiyat, bioxilma-xillikni moliyalashtirish sohasidagi mutaxassislar hamda xususiy sektor vakillari qatnashdi. Ishtirokchilar bioxilma-xillikni saqlash uchun moliyaviy resurslarni safarbar etish borasida erishilgan yutuqlarni muhokama qildilar va ushbu yo‘nalishdagi moliyaviy mexanizmlarni joriy etish bo‘yicha muvaffaqiyatli tajribalar bilan o‘rtoqlashdilar.

Tadbirning asosiy maqsadi tabiatni muhofaza qilish tashabbuslarini moliyalashtirishning samarali yondashuvlarini aniqlash va ommalashtirish, shuningdek, bioxilma-xillikni asrash bo‘yicha chora-tadbirlarni keng ko‘lamda amalga oshirish imkoniyatlarini yaratishdan iborat bo‘ldi. Ekologik siyosatni davlat rejalashtirish tizimiga integratsiya qilish, moliyaviy vositalarni takomillashtirish va tabiatni muhofaza qilish loyihalarini amalga oshirish uchun qo‘shimcha investitsiyalarni jalb etish masalalariga alohida e’tibor qaratildi.

Ishtirokchilar 2030-yilgacha mo‘ljallangan bioxilma-xillik bo‘yicha global maqsadlarni amalga oshirish jarayoni davomida tabiatni muhofaza qilish, iqlim o‘zgarishi va yer resurslarini barqaror boshqarish o‘rtasidagi uzviy bog‘liqlikni hisobga oluvchi kompleks yondashuvlarning ahamiyati ortib borayotganini ta’kidladilar. Shuningdek, bioxilma-xillikni saqlashga yo‘naltirilgan investitsiyalar oziq-ovqat va suv xavfsizligini ta’minlash, iqlim o‘zgarishlariga moslashuvchanlikni oshirish hamda iqtisodiy barqarorlikni qo‘llab-quvvatlashning muhim omili ekanligi qayd etildi.

Muloqotning ochilish marosimida Turkiya Tabiatni muhofaza qilish va milliy bog‘lar bosh boshqarmasi direktori Kadir Chokchetin, BMTTDning Turkiyadagi doimiy vakili Monika Merino, BMTTDning BIOFIN global menejeri Martin Cadena, BMTTDning Istanbul mintaqaviy markazi direktori Steliana Nedera, Armaniston Respublikasi moliya vaziri o‘rinbosari Edgar Mkrtchyan hamda boshqa xalqaro tashkilotlar va davlat tuzilmalari vakillari ishtirok etdilar.

Ta’kidlanishicha, muloqot mintaqa uchun muhim davrda o‘tkazilmoqda. Hozirda 33 ta mamlakat BIOFIN ko‘magida ishlab chiqilgan bioxilma-xillikni moliyalashtirish rejalari bo‘yicha rejalashtirish bosqichidan amaliy amalga oshirish bosqichiga o‘tmoqda. Ushbu rejalar tabiatni muhofaza qilish faoliyati uchun moliyalashtirish ehtiyojlarini aniqlash, davlat xarajatlarini tahlil qilish, amaldagi siyosat va institutlar samaradorligini baholash hamda bioxilma-xillikni saqlash maqsadida resurslarni safarbar etish uchun aniq moliyaviy yechimlarni ishlab chiqishga xizmat qiladi.

Oʻzbekiston delegatsiyasining ushbu tadbirdagi ishtiroki atrof-muhitni muhofaza qilish sohasida xalqaro hamkorlikni yanada mustahkamlash va bioxilma-xillikni saqlash bo‘yicha milliy hamda global maqsadlarga erishishga qaratilgan zamonaviy moliyalashtirish mexanizmlarini ilgari surish yo‘lidagi navbatdagi muhim qadam bo‘ldi.