Toshkentda ekologiyaga bag‘ishlangan xalqaro haykaltaroshlik simpoziumi bo‘lib o‘tmoqda
2026-06-23 16:30:00 / Yangiliklar
O‘zbekiston Respublikasi Ekologiya va iqlim o‘zgarishi milliy qo‘mitasi, Toshkent viloyati hokimligi, O‘zbekiston Badiiy akademiyasi va Badiiy ijodkorlar uyushmasi hamkorligida tashkil etilgan mazkur simpoziumda tosh va metalldan haykaltaroshlik namunalari yaratilmoqda.
Ta’kidlash joizki, mazkur simpozium Samarqand shahrida bo‘lib o‘tayotgan Global ekologik jamg‘armaning VIII sammiti va Kengashining 71-yig‘ilishi hamda “Eco Expo Central Asia 2026” xalqaro ko‘rgazmasi doirasida tashkil etildi. Unda Italiya, Fransiya, Xitoy, Turkiya, Gruziya kabi xorijiy davlatlar hamda mamlakatimizdan 20 nafarga yaqin taniqli haykaltarosh “Ekologiya va san’at” mavzusida tabiatni asrab-avaylashga bag‘ishlangan asarlarini taqdim etadi.
Avvalgi simpoziumlarda yasalgan haykallar Toshkent va Samarqand shaharlariga qo‘yilgan bo‘lsa, bu yilgi simpozium yakunida barpo etilgan haykaltaroshlik asarlari Toshkent viloyatining Nurafshon shahriga o‘rnatilib, bu orqali aholi o‘rtasida eko-odatlar va ekologik hayot tarzini targ‘ib etish maqsad qilingan.
Simpoziumni o‘tkazish uchun Toshkent metallurgiya zavodi tanlangani bejiz emas. Ushbu sanoat korxonasi ijodiy va texnologik jarayonlarning o‘zaro bog‘liqligini namoyish etish, “yashil” rivojlanish uchun innovatsion yechimlarni o‘rganish va ekologik muammolarni hal qilishda yangi yondashuvlarga ilhomlantiradigan badiiy hunarmandlik asarlarini yaratish uchun qulay maydondir.
Simpozium 26-iyunga qadar davom etadi. Unda yasash uchun tanlangan loyihalar nafaqat badiiy qiymatga ega, shu bilan birga ona sayyoramizni asrab-avaylash zarurati haqida muhim chaqiriq bo‘lib xizmat qiladi.