O‘zbekiston Respublikasi Ekologiya va iqlim o‘zgarishi milliy qo‘mitasi

 Yig’ilishda Ekologiya vaziri – Simpoziumga tayyorgarlik koʻrish va oʻtkazish boʻyicha Respublika tashkiliy-ishchi guruhi rahbari A.Abduhakimov vazirlik tomonidan ekologiya targʻibotiga bagʻishlangan xalqaro plener, koʻrgazma, plogging va ekomarafonlar oʻtkazib kelinayotgani, bunday tadbirlar odamlarda ekologik dunyoqarashni kuchaytirishda muhim omil ekanini taʼkidladi. Dunyo madaniyati beshiklaridan boʻlgan Parij, Bryussel, Milan, Sankt-Peterburg kabi shaharlarda yuksak did bilan yasalgan haykallarni har yili millionlab sayyohlar koʻrishga oshiqishi bu fikrning dalilidir.

Anʼanaviy Xalqaro haykaltaroshlik simpoziumi mamlakatimizda ana shunday yangi tashrif obyektlarini ochishga qaratilgan boʻlib, Samarqand va Toshkentda oʻtkazilgan simpoziumlarda yaratilgan haykaltaroshlik asarlari bugungi kunda yurtimiz madaniyati va turizm jozibasini oshirishga xizmat qilmoqda. Ushbu tadbirlarda qatnashgan xorijlik taniqli haykaltaroshlar Oʻzbekistonda sanʼatning mazkur turi jadal rivojlanayotganini eʼtirof etib, bu yil ham unda qatnashish istagini bildirgan.

Yigʻilishda joriy yil 10-avgustdan 10-sentyabrga qadar oʻtkaziladigan “Toshkent – 2024” III xalqaro haykaltaroshlik simpoziumini tashkillashtirish bilan bogʻliq vazifalar muhokama qilindi. Tadbirni oʻtkazish uchun Oʻzbekiston Badiiy ijodkorlar uyushmasi buyurtmachi etib belgilangan boʻlib, uyushma raisi I.Valixoʻjayev amalga oshirilgan ishlar va hal qilinishi lozim boʻlgan tadbirlar haqida maʼlumot berdi.

Videokonferens-aloqa orqali Qurilish va uy-joy kommunal xoʻjaligi, Transport, Energetika vazirliklari, shuningdek, Toshkent shahri, Samarqand va Buxoro viloyatlari hokimliklari tomonidan tadbirni yuqori saviyada oʻtkazish boʻyicha amalga oshiriladigan ishlar koʻrib chiqildi.

Ushbu simpozium nafaqat mahobatli haykaltaroshlik asarlari yaratish, ayni paytda xorijiy va mahalliy professional haykaltaroshlar ishtirokida yosh ijodkorlar uchun mahorat maydoni boʻlishi uchun talaba-volontyorlarni koʻproq jalb etish, oʻz navbatida, xorijliklarni yurtimiz madaniyati, tabiati, turizmi va noyob madaniy merosi bilan tanishtirish maqsadida shunday manzillarga sayohatlar tashkil etish zarurligi taʼkidlandi.