Musobaqada Markaziy Osiyo mamlakatlari, xususan, Qozog’iston, Qirg’iz Respublikasi, Tojikiston, Turkmaniston hamda Ozarbayjon davlatlaridan kelgan, shuningdek, O’zbekistonning 13 hududidan kelgan yoshlar jamoalari ishtirok etdi.

Musobaqa ikki bosqichda o’tkazildi. Dastlab mahalliy jamoalar atrof-muhitni muhofaza qilish borasidagi bilimlarini sinovdan o’tkazishdi. Ishtirokchilarga atmosfera havosini muhofaza qilish, tabiiy resurslardan oqilona foydalanish, chiqindilarni belgilanmagan joyga tashlamaslik va boshqa ekologik masalalarni qamrab olgan jami 24 ta savol yo’llandi. Yakunda Surxondaryo viloyati 1-o’rinni, Toshkent viloyati 2-o’rinni, Qoraqalpog’iston Respublikasi jamoasi 3-o’rinni egalladi.

Ikkinchi bosqichda esa Markaziy Osiyo davlatlari va Ozarbayjon yoshlari o’zaro bellashishdi. Yakunda O’zbekiston jamoasi 1-o’ringa, Qozog’iston Respublikasi 2-o’ringa, Qirg’iz Respublikasi esa 3-o’ringa sazovor bo’ldi. G’oliblar munosib taqdirlandi.

“Eko-zakovat” xalqaro musobaqasi yoshlarning ekologik bilimlarini yanada mustahkamlashga, mahalliy va xalqaro yoshlarni bir maqsad — tabiatni asrash yo’lida birlashtirishga va o’zaro tajriba almashishga xizmat qiladi.