Tadbirda dunyoning 150 ta mamlakatidan 10 mingga yaqin xorijiy va mahalliy ishtirokchilar qatnashdi. Ular orasida xalqaro tashkilotlar rahbarlari va vakillari, diplomatik korpus a’zolari, shuningdek, yirik xalqaro va mahalliy kompaniyalar vakillari bor edi. Mazkur xalqaro ko‘rgazmaning Samarqandda o‘tkazilishi O‘zbekiston uchun ekologik barqarorlik, “yashil” iqtisodiyot va iqlim kun tartibi yo‘nalishlarida global hamkorlikni kengaytirish bo‘yicha noyob imkoniyatlar yaratdi.

Ko‘rgazma doirasida O‘zbekiston va Markaziy Osiyo davlatlarining eko-innovatorlari tomonidan ishlab chiqilgan startap loyihalar namoyish etildi. Shuningdek, xalqaro investorlar va moliyaviy institutlar bilan aloqalar o‘rnatish hamda ushbu tashabbuslarni keyinchalik moliyalashtirish uchun keng imkoniyatlar yaratildi. Ushbu imkoniyatlardan samarali foydalanish maqsadida tadbirni yuqori saviyada tashkil etish bo‘yicha qator strategik vazifalar amalga oshirildi.

Ko‘rgazmada ekologik mahsulotlar va xizmatlarga bag‘ishlangan 116 ta pavilyon tashkil etildi. Unda GGGI (Global Green Growth Institute), OTB (Osiyo taraqqiyot banki), YTTB (Yevropa tiklanish va taraqqiyot banki), “Vision Invest” (Saudiya Arabistoni), SUEZ (Fransiya), Cevia Environment (Xitoy), KOMOTO (Yaponiya), EPSOY(Finlyandiya), Siberian Wellness (Rossiya), Bell Energy (BAA), Oizom Instruments (Hindiston) kabi yirik xalqaro tashkilot va kompaniyalar, shuningdek, Navoiy kon-metallurgiya kombinati, Olmaliq kon-metallurgiya kombinati, AKFA, Jizzax Akkumulyator Zavodi, “O‘zkimyosanoat” AJ va boshqa yirik mahalliy korxonalar o‘z pavilyonlari bilan ishtirok etdi.

Bundan tashqari, eko-innovatorlarning yangi innovatsion startap loyihalarini namoyish etish uchun qo‘shimcha ravishda 37 ta stend faoliyat yuritdi.

Mamlakatning barcha hududlari iqlim o‘zgarishiga moslashish va ekologik barqarorlikni ta’minlashga qaratilgan, o‘z hududlarining salohiyatini aks ettiruvchi loyiha paketlarini taqdim etdi. Ushbu tashabbuslar donorlar va investorlar e’tiboriga havola qilindi.

Ko‘rgazma davomida nufuzli xalqaro tashkilotlar va kompaniyalar bilan “yashil” energetika, iqlim o‘zgarishiga moslashish, suv resurslarini boshqarish, chiqindilarni qayta ishlash va boshqa ekologik yo‘nalishlarda amaliy hamkorlikni kengaytirishga qaratilgan 300 ga yaqin bitim va kelishuvlar imzolandi.

Xalqaro ko‘rgazma doirasida, shuningdek, 50 dan ortiq sayd-iventar, muloqot maydonchalari va tematik tadbirlar tashkil etildi.

Umuman olganda, mazkur tadbirni tashkil etishdagi kompleks va strategik yondashuv O‘zbekiston uchun iqlim va ekologiya sohalariga yirik investitsiyalarni jalb etish, ilg‘or xalqaro tajribani joriy etish hamda mintaqaviy va xalqaro hamkorlikni yangi bosqichga olib chiqish imkoniyatlarini yaratmoqda.